U Myntri Rangbah ka Jylla u Conrad K Sangma mynta ka sngi ula plie pyrda ia ka prokram ba la tip kum ka State-Level Chief Minister’s Youth Engagement Program 2025 ha skulbah NEHU, Shillong, ha ryngkat ka jingsynran lang jong u Myntri ba dei peit ia ki kam ialehkai ka jylla u ma Wailadmiki Shylla.
U Myntri Rangbah ula pynpaw ka jingkmen ban ioh ia kane ka lad ban plie pyrda ia kane ka prokram jong ki samla, kiba la wan ban iashim bynta na kylleng ki bynta jong ka Jylla naduh rilum Garo, Khasi bad Jaintia na ki skul bapher bapher.
U ong ba ka jingthmu jong kane ka prokram ka long ban wanrah jingkylla bad ka jingpynkup bor ia ki samla ba kin pyni ia ka sap ka phong ba ki don, ban pyntbit shuh shuh ia ka jingtbit kaba don ha ki bad ba kin pynkhreh da kaba sngewskhem ialade na ka bynta ka lawei.
Na ka liang u Myntri Rangbah ula pynsngew ba ka sorkar ka don ka jingiohi jngai ia ki khun samla ka jylla. Ha kaba ka sorkar ka kwah ban buh ia ki samla ban iaid ryngkat bad ki jingthmu kiba ialam ia ki ban ioh i ia kiei kiei kiba kham khraw ha ka jingim jong ki. Ula pynkynmaw ia ki samla ba kaei kaba ka sorkar kala thaw mynta ka sngi ka dei ia ki ban rah ia ka sha khmat.
Khadduh eh ula kyntu ia ki samla ba pyndonkam hok ia kaei kaba kila ioh na kane ka prokram khnang ba kin lah ban ialam khambha shuh ia ka jylla ha ki sngi ki por ban sa wan.
Na ka liang jong ki khynnah skul na ki bynta bapher bapher kila wan poi ha nongbah Shillong naduh hynnin ka sngi, lait noh tang kito ki skul kiba kut Exam hynnin kila wan poi mynta ka sngi hapoh NEHU. Ia kine ki samla la pynsah miet ha ki Hotel kiba bit ba biang bha. Ia ki kynthei la pynsah ha ki jaka ba kham shajan kata ha ki bynta jong ka Polo, katba ia ki shynrang pat la pynsah ha ki Hotel kiba don ha PB. Ia kine ki samla la leit on bad leit shaw da ki bus na ki jaka sah sha ka jaka ba long ka prokram hapoh NEHU Campus.
