Ka lympung ialehkai phutbol kaba la tip kum ka 6th Debo Shullai Memorial Trophy ne ka 2nd Division Football Tournament 2022, kaba la pyniaid da ka West Jaiñtia District Sports Association (WJDSA), ka la poi noh sha kaba kut mynta ka sngi ha ka jingïakhun Final kaba long, ha madan Kiang Nangbah Stadium, Jowai hapdeng ka Chutwakhu SC pyrshah ia ka Mooknor Thadmuthlong SC, ha kaba ka Chutwakhu SC la long ka lahduh da kaba ka la lah ban pynliem ia ka Mooknor Thadmuthlong SC da 1-0.
Mynta ka sngi u MLA ka Shillong South ma Sanbor Shullai uba long u Chairman MTDC ka sorkar jylla u la long u kongsan.
Ka Chutwakhu SC kala ioh rah ia kane ka nam lahduh hadien ba ka la lah ban pynliem ia ka Mooknor Thadmuthlong SC da 1-0 kol. Haba phai sha ka jingiakhun marsien sdang tang haka minit kaba 9 ka Chutwakhu SC kala ioh ban thep ia katei ka kol lyngba u Luckyness Khyriem. Hadien kane ka kol ka jingiakhun ka la sdang ban itynnad bad iakhaid bha, ha kaba haduh ba kut jong ka kylla step jong ka jingiakhun kala neh 1-0 kol.
Ha ka kylla miet jong ka jingkhun kala nang itynnad shuh shuh hynrei hangne ka Mooknor Thadmuthlong kaba la pyrshang katba lah ban siew ia katei ka shi kol hynrei ym don lad satia na ka jingtskhem jong ki nongap bak ka Chutwakhu, kumta ka jingiakhun ka la kut noh da 1-0 kol ha kaba ka Chutwakhu SC ka la ong ka lahduh ha kane ka lympung mynta u snem.
Mynta u snem ia ka nam Best Goal Keeper la ioh da u Lalmalsawma Tariang jong ka Chutwakhu SC, Top Scorer la iohrah da u Chanmitre Dkhar na ka Lion Sports and Youth Affair uba la ioh ban thep haduh 6 tylli ki kol, ia ka nam man of the match la iohrah da u Luckyness Khyriem na Chutwakhu SC bad ia ka nam Player of the Tournament la ioh rah da u Luckyness Khyriem hi na Chutwakhu SC.
Ia ki khusnam la sam da u kongsan ma Sanbor Shullai, kumjuh ruh da kiba ha ïing ha sem jong u ma Debo Shullai.
Ha kane ka sngi la don lang ruh u ma EMH Pasah, Working President WJDSA, General Secretary WJDSA ma Lammat O Laloo, DSO WJHD ma K. Pasah, Doloi Elaka Jowai ma Puramon Kynjing, kiwei de ki dkhot ka WJDSA kiba la shongthait bad kiba dang bat ia ka kam mynta, kiba ha iing ha sem jong u ma Debo Shullai lem kiba sha khot sngewbha.
