Rah nam lahduh ka Lumiaw Barato ha ka 1st KFT ka Christ School, Mukroh

Ban pynmih Fund ia ka Christ School Upper Primary School, Mukroh, ki nongpyniaid kila pynlong da ka 1^st Knockout Football Tournament kaba la sdang naduh u bnai July 2023 bad kala poi sha kaba kut (Final) ha kane ka 29/09/2023, ha madan phutbol jong ka skul, ha kaba ka Lumiaw Barato kala long ka lahduh hadien ba kala pynliem ia ka Saviour United Sport Club Barato lyngba ka tie breaker da 6-5 kol.

Ha kane ka Tournament don bun tylli ki team kiba la wan iashim bynta napoh ka Elaka Shilliangmyntang bad kiba la poi sha ka Final ki long ka Lumiaw Barato pyrshah ia ka Saviour United Barato, ha kaba u ma Joshwa Franky Lyngdoh ula long u kongsan, ha kane ka sngi Final.

Ka jingialehkai ka long kaba iathaiñ bha ha kaba baroh ar team kiba bun ki player ki de kiba la wanrah na shabar jylla. Naduh kaba sdang jong ka jingialehkai haduh kaba kut baroh arliang kim shym la lah ban thep kol.

Ha ka jingialehkai ki player ki la iaksaid ban pynjop la ka liang ka liang, hynrei u Referee ma Embhah Rymbai ban control ia ka jingialeh ula hap ba ai yellow Card ia u No.15 jong ka Saviour United bad naduh ba la ai yellow card, ka jingialeh ka la long shisha kaba itynnad bad kaba pynhun ia ki nongwan peitkai lyngba ki sap ki talen jong jong ki nongialehkai.

Ban pynkhraw ia kane ka sngi Final Football, ki nongpyniaid ia ka Christ School Upper Primary School hapoh ka jingpyniaid u Dr. Henry Lamin, uba long u nongseng ia kane ka skul, ki la pynlong ia ka Mini Fete ha kaba u ma Sarlangki Dkhar, u kyrtong uba la mang da ka Voice of People’s Party (VPP) ban iakhun na ka Barato MDC Constituency ha kane ka Elekshon MDC ka ban wan 2024 lane kham hadien ula long u kongsan. Ha ka por ba plie ia ka Mini Fete ki briew ki ba wan sha ka Fete ki duna, hynrei shwa ban sdang ka Final bol ha ka por 2 baje nohphai sngi, ki riew ieit football napoh Mukroh, Saba, Maidieñ, Yongkynshur, Barato, Lapangap, Phlang, Kyarabon bad na kiwei de ki shnong kila wan da ki kali Pick-up, ki Maruti Van bad ki Tourist Taxi haduh ba la pyndap smam ia baroh sawdong ka madan ialehkai bol.