U National President jong ka Nationalist People’s Party (NPP) u Conrad K Sangma uba dei ruh u Myntri Rangbah jong ka Meghalaya mynta ka sngi ula ai ka jingkyrkhu kyrdoh ia u Dr. Lorho S Pfoze uba la shah pynkhamti kum u President jong ka NPP Manipur State Unit, ha nongbah Shillong.
Haba ai jingkren ha ka jingialang, u Sangma ula ong ba ka jinglong nongialam jong u Dr. Lorho hapoh ka party kan iarap shuh shuh ia ka party ban ai ka jingshakri kaba bha tam ia ki briew jong ka jylla Manipur.
U Sangma ula pynpaw ia ka jingsngewkmen ban iohi ia kiwei pat ki dkhot jong ka NPP kiba na ka jylla Manipur kiba la wan poi ha nongbah Shillong mynta ka sngi, kiba kynthup ia u Rameshwar M Singh, MLA bad Leader of Legislative Party, u Loken Singh Chief Whip, u Noorul Hasan, MLA bad Working President ka Manipur bad u Janghemlung Panmei, MLA bad Working President ka Manipur.
Kum u khliehduh jong ka NPP u Sangma u don ka jingkyrmen kaba khraw ba kine ki nongialam kin long kiba iatreilang na ka bynta ban pynkhlain shuh shuh ia ki kam jong ka NPP ha Manipur.
