U SM. Sahai haka jingdonlang u H.C. Chaudhary, IFS Additional Principal Chief Conservator of Forest Wildlife & Chief Wildlife Warden Meghalaya ula plie paidbah ia ka Ïung Duwan ka Raij U Langdoh, Ïonglang kaba la shna hapoh ka Integrated Development of Wildlife Habitat haka jinglut kaba 30 lak tyngka.
Ka DFO Jaintia Hills Wildlife Division ka Kong H. Lato MFS haka jingkren maitphang ka la iathuh ba ia ka khlaw kyntang ka Raij Ïonglang kaba heh kumba 15.12 Hectare la ithuh ia ka kum ka Community Reserve Forest naduh u snem 2016. Ka la iathuh ruh ba ha West Jaintia tang hapoh ka khlaw kyntang jong ka Raij Ïonglang lah ban shem ia u mrad uba la jan duh jait uba tip kum u Huleng (Hoolock Gibbon) katba ha East Jaintia pat la shem ia u tang hapoh ka khlaw Narpuh.
U kongsan u S M. Sahai ha ka jingkren ula ong kadei ka kamram jong uwei pa uwei ban pynneh pynsah iaki khlaw ki btap bad ki jingthaw ba im. “Ka jylla Meghalaya kadei kaba riewspah bha haka jingdon ki khlaw ki btap, ki phlang ki kymbat, ki mrad ki mreng bad ki dieng ki siej”, la ong u Sahai bad ula kyntu iaki paidbah ban kiar na kaba pynjot iaki khlaw ki btap bad pyniap dusmon iaki mrad ki mreng, ki sim ki doh namar ki don ka bynta kaba khraw haka mariang.
Kiwei de kiba la ai jingkren ki long u H.C. Chaudhary kum u symbud kongsan, u James M Pohsngap, u Dolloi ka Elaka Raliang u C. Lyngdoh bad ki kyntien khublei na u S. Law Range Forest Officer.
Hadien ka jingialang la sam khusnam sha baroh ki nongjop haki jingiakop bapher bapher kum ka jingiakop Drawing, Extempore Speech bad Quiz ba la pynlong da ka tnad Wildlife ha ka jingdonlang ki nonghikai bad ki khynnah skul.
