Ki nongshong shnong ka Bamkamar West Jaiñtia Hills District kiba hap hapoh ka jingpeit u Dolloi ka Elaka Nartiang mynta ka sngi Saitjaiñ kila pynlong ka jingïalang paidbah ha Bamkamar L.P School ban pyrshah jur halor ka jingthung Acting Waheh Shnong ba shipor khlem da ïoh ka jingmynjur lang na ki nongshnong shnong.
Ha kane ka jingïalang la wan ban shim bynta da spah ngut ki longkmie bad ki longkpa na baroh lai tylli ki dong jong ka shnong kiba la ai ruh ka jingkren pyrshah ïa kane ka jingthung Acting Waheh Shnong ba shipor ïa u Medris Nongrum da kaba ong ba kane ka dei ka jingleh donbor u Dolloi ka Elaka Nartiang lem bad ki katto katne ki nongïalam hapoh ka shnong bad na ka liang jong ki kum ki paidbah kim pdiang satia ïa kane.
Katkum ka shithi bala ïoh pdiang na ka Administrative Officer ka JHADC kala rai ban thung Acting Waheh Shnong da kaba hukum ïa u Dolloi ka Elaka namar ka por u Waheh Shnong kala kut naduh ka 16.05.2026, hynrei katkum ka shithi u Dolloi ula phah sha ka Council bad pyntip ba ym pat lah ban pynlong ïa ka Election ban jied Waheh Shnong namar ka lah ban wanrah ka jingkynrum kynram kaba ktah ïa ka shongsuk shongsaiñ bad kane ka jingkynnoh ka long kaba bakla ong kitei nongshong shnong.
Hadien ba ka Council kala peit bniah ïa ki report ba la phah da u Dolloi lem bad ka kyrteng u Acting Waheh Shnong, naka liang ka JHADC kala ithuh ïa katei kyrteng jong u Medris Nongrum naka bynta ka samoi treikam kaba 6 bnai, katkum ka Section 30 jong ka The Jaintia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act, 2015, ka ban kut ïa u haduh ka 9.1.2027.
Halor kane ka jingleh u Dolloi khlem da ïoh jingmynjur lang da ki paidbah ka shnong kala pynlong ïa ki ban ïamih paidbah mynta ka sngi bad pynsngew ïa ka jingbym hun jong ki halor kane ka jingleh u Dolloi, kila kyrpad ïa ki bor jong ka Council ba kin pynbeit mardor ïa kane ka jingleh u Dolloi lem bad ki katto katne ngut ki nongïalam shnong.
Na ka liang u Thomlin Rynjah uba dei ruh u Waheh Shnong barim haba kren sha ki lad pathai khubor hadien ka jingïalang ula ong ha ka jingïalang paidbah jong ki mynta ka sngi kila pynrem jur ïa katei ka jingai report jong u Dolloi bad ki long ki bym shisha khlem da pyntip shwa sha u paidbah lyngba ka Dorbar.
Halor kane u ong kum ki nongshong shnong ka Bamkamar kim pdiang satia ïa kane ka jingleh u Dolloi bad ki katto katne ngut, shuh shuh ula pynsngew mynta ha kaba ïadei bad ki jingeh hapoh ka shnong haka liang ki kot ki sla ban pynshisha ïa ki kum ki nongshnong shnong bad khamtam eh ïa ki samla pule, namar kim pat hun satia haduh mynta ïa katei ka jingjied Acting Waheh Shnong.
Ula kren shai lada ki bor ba halor kim lah ban pynbeit mardor ïa kane, na ka liang jong ki kum ki nongshnong shnong kila rai ba ïaid shakhmat katkum ki kyndon aiñ, khnang ba kin ïoh ïaka hok kum ki nongshnong shnong, haka juh ka por ki kwah ban ïoh noh ïa u Waheh Shnong ba pura jong ka shnong Bamkamar da uba ïamon lang da baroh.
