Hadien ba ioh shibun ki jingujor naki ba bun ki khynnah pule ba duh class ki ba lah shah kyntait, mynta ka sngi ki nongialam ka JSM Western Region bad JYF Jowai Circle ki la leit ban iakynduh ia u in-charge Principal jong ka Kiang Nangbah Higher Secondary School bad u la ong ba katkum mynta kim lah shuh ban pdiang khynnah skul namar ba ki lah ban pdiang tang 350 ngut. U la pynsngew ruh ba wat tang da kine ki 350 ngut ruh la khapniah bha namar ka jingrit jong ki classroom.
Te kumta la kyntu ia ki khun samla kiba duh class ba kin pyntip sha ka seng JSM bad JYF khnang ba kin lah ban ia kren bad ka sorkar.
Naka liang u Ribok Biam President ka JSM u la ong ba balei ia ngi ki nong Jaiñtia ka sorkar ka ibeiñ namar lada nujor bad kiwei kiwei ki district kim juh long kumne, ha Jaiñtia pat man la u snem ka jia kumne. U la pynkynmaw ruh ba ka sorkar ka dei ban ai noh da ka Government College hapoh East Jaiñtia Hills District khnang ba kan jah noh kane ka jingjynjar.
Naka liang ki ar seng ki la ong ba lada ka sorkar kam shim khia ia kane ka mat, yn sa wan rah biang ia ka jingiakhih kum ha ki snem ba lah dep.
