Ki nongialam jong ka Khasi Author Society’s( KAS) ha ka 4 tarik Jylliew 2026 ki la iakynduh ia u Amit Shah Myntri ka sorkar pdeng ban iakren haba iadei bad ka jingdawa ka kynhun ban pynrung noh ia ka ktien khasi ha ka khyrnit kaba phra.
Haba kren sha ki lad pathai khubor u Dr DRL Nonglait u la ong ka Khasi Author Society ka la phah biang da ka dorkhas sha u Amit Shah ban pynkynmaw biang haba iadei bad ka jingdawa ban pynrung ia ka ktien khasi ha ka khyrnit kaba phra. U la ong ha u bnai Kyllalyngkot 2021 ka khasi Author Society ka la phah da ka dorkhas ha u Amit Shah haba iadei bad ka jingdawa ban pynrung ia ka ktien khasi bad kumjuh ha u bnai Naitung 2021.
Nalor kata u la ong ba khasi Author Society ka la pynlong ruh ia ka Seminar ha u snem 2023 ha Delhi bad mynta ka sngi ka 4 tarik Jylliew 2026 ka Khasi Author Society ka la kynduh biang ia u Amit Shah ban pynkynmaw biang haba iadei bad ka ktien khasi.
Na ka liang ka Khasi Author Society ka la pynsngew ruh ha u Amit Shah ba ka Sorkar Meghalaya lyngba ka Meghalaya Languages Ordinance 2026 ka la pynlong bad ithuh ruh ia ka ktien khasi kum ka ktien Sorkar , bad ka Sorkar India ka dei ban shim noh ia ki Sienjam ban pynrung noh ia ka ktien khasi ha ka khyrnit kaba phra.
Na ka liang u Amit Shah u la pynpaw ha ki nongialam ka Khasi Author Society ba kiba bun tylli ki jait ktien kiba dawa ban pynrung ha ka khyrnit kaba phra bad ka Ministry kan sa peit bniah ia kane ka kam bad u la kdew tikna ruh ka ktien khasi ka dei kawei na ki jait ktien ba ka Ministry kan sa peit bniah la ong u Dr DRL Nonglait nongialam ka khasi Author Society.
