U Chief Minister jong ka jylla u Conrad K Sangma ula ong ba ka Bangkok bad kiwei pat ki ri jong ka South East Asia kila long kiba khamjan ia ka jylla haba ianujor ia ka jingjngai jong ka nongbah ka ri ka Delhi, kane kan iarap shibun ban pynkiew ia ka khaï ka pateng bad ki kam jngohkai pyrthei bad kine ki ri ka pyrthei.
Ia kane u Conrad ula kren ha ka jingialang jong ka 2nd North East India Festival kaba long ha nongbah Bangkok, jong ka ri Thailand. Ia kane ka tamasa ba lai sngi yn pynkut ha ka sngi Sunday. Ha kane ka tamasa la ioh ban pyni pyrthei ia ki Riti dustur, ki jingrwai tynrai, ki jingbam tynrai bad ki jaka jngohkai kiba lah ban shem ha North East India.
U Sangma ula ong ruh ba ka North East India bad ki ri jong ka South East Asian ki lah ban pynlong ia ka jingiateh paralok ha ki kam khaïi pateng, ki Banking, ki Riti ki dustur bad kiwei de ki jingiadei namar ba kine ki thaiñ ki don ka jingiadei kaba jan bha ha ki rukom long rukom man.
Ula pynkynmaw ruh ba ka jingiadei hapdeng ka India bad ka Thailand kala neh palat 2000 snem mynta. Naduh ka por jong u Syiem Ashoka ha ki spahsnem ba Lai haba la wanran ia ka niam Bhudhis ha ka ri Thailand na India.
U la iaroh ruh ia ka jinglah jong ka sorkar India ban pyntreikam ia ka “Act East Policy” kaba dei kawei na ki jingtreikam jong ka sorkar India na ka bynta ban wanrah ia ka roi ka par ha ka thaiñ Shatei Lammihngi hi baroh kawei. Lyngba kane ka Policy na ka liang jong u Prime Minister jong ka ri India u Narendra Modi ruh u la buh ka jingshaniah ia ki jylla jong ka North East ban kin pynkhlaiñ ia ki kam khaïi pateng bad ban pynkiew ia ka ioh ka kot jong ka thaiñ, da kaba ailad ban don ka jingiadei kaba jan bha bad kiwei pat ki ri jong ka South East Asia.
U Conrad u kyrmen ba ka thaiñ North East baroh kawei kan don ia ka policy treikam kaba lah ban wanrah jingmyntoi ia ka thaiñ hi baroh kawei bad kumjuh ruh ia ka ri Thailang kaba la don jingmut bad tei ia ki Mini FTAs ha ki san tylli ki jylla hapoh ka ri India kiba kynthup lang ia ka jylla Assam.
Ka long ruh ka jingshisha ba dang shen ka Union Finance Minister jong ka ri India kala dep ban pynbna ban pyllut haduh UDS 17.19 Billion na ka bynta ban tei ia ki lain rel, ki surok bad ki jingpyniasoh lyngba ki liengsuiñ hapoh North East. U Myntri Rangbah ula ong ruh ba ka Act Eat Policy kala ioh jingiaroh na ka Thailan’s Act West Policy na ka bynta ban wanrah ka jingiajan hapdeng kine ki ar tylli ki ri.
