Ka Join Action Committee (JAC) ba la pynlong mynta ka sngi hapdeng ka JSU Seng Kmie bad ka Synjuk Waheh Chnong Jowai (SWCJ) ha ka jingiadon lang ki nongialam ka SWCJ naduh u President u Waheh Alan Niangti, u General Secretary ka SWCJ u Waheh Riquoma Rq Laloo bad ki dkhot ka EC SWCJ bad na ka JSU la ia don u General Secretary u samla Treibor R Suchen bad u Education Secretary u samla Eddy K Pohtam bad ki dkhot ka seng kmie.
Ha kane ka jingialang la shim ia ka rai ban pan jingshai na ka sorkar jylla na bynta ka jingpynslem ka sorkar ban plie noh ia ka B.Ed College ha Jowai bad ha ka juh ka por ka JAC ka dawa ruh na ka sorkar ba ka dei ban plie noh ia kane ka B.Ed college namar ia ka building ban pynlong klas ka sorkar ka la dep ban shna kyrpang ka ba don ha Mynthong Jowai bad ia ki nongtrei ha kane ka College ruh lah dep ban thung kam hynrei kaba phylla ka long ba ka college pat kam don satia.
Na ka liang u General Secretary ka seng JSU u samla Treibor R Suchen u lah ong ba ka JSU ka lah dep ban dawa ia ka B.Ed College ha Jaintia naduh u snem 1987 haka por ba long President u Ma Garland Rymbai bad u R. Swer kum u General Secretary bad u la ong ba ka sorkar jylla ka dei ban pynkloi ban pan noh ia ka jingithuh ia ka B.Ed college ha Jowai na ka NCTE na Delhi ban ioh plie noh kloi ia kane ka college namar ia mynta kane ka building jong ka B.Ed College la pynlong pynban da ka Higher Secondary School jong ka Kiang Nangbah College shipor kat bym pat plie ia ka B.Ed college hapoh kane ka building.
U samla Suchen u la ong ruh ba sorkar jylla kam dei ban leh shiliang ia ka ri Jaintia namar ka seng lah 35 tylli ki snem ka lah dawa ban plie ka B.Ed College ha Jaintia hynrei ka sorkar bad ki nongmih khmat kim shim khia bad u lah ong ba dang shen ka Tura ka la lah ban plie ia la ka jong ka B.Ed Collge bad kane la pynbna hi da u Myntri Rangbah ka Jylla u Conrad Sangma.
Na ka liang ki nongialam jong ka Synjuk ki Waheh Chnong Jowai ki la ong ba ka sorkar ka dei ban plie noh ia kane ka jaka pule ban ioh jingmyntoi ki khynnah pule ka thaiñ khamtam ba dang duna ki jaka pule B.Ed hapoh ka jylla bad ki la ong ruh ba kane ka JAC kan sa phah da ka shithi sha u Myntri Rangbah ka jylla bad sha u Myntri ka tnad pule puthi ban dawa ban plie noh mardor ia kane ka jaka pule kaba lah sah teng la bun tylli ki snem mynta.