Mynta ka sngi i District Magistrate, East Khasi Hills District ila pynmih ia ka hukum hapoh ka kyndon 144 CrPC ba nangne shakhmat la khang ban die madan ia kino kino ki jait tiar kiba nep ha shilynter jong ka Police Bazaar bad Jail Road, Shillong.
Ki bor pyniaid District ki ai lad pat ban die ia kine ki jait tiar tang hapoh ki dukan ki bym pynpaw lyngkrang ia ki.
Ia kane ka hukum la pynmih hadien bala ioh ia ka jingujor ba ki don bun ki nongdie surok/madan ki die ia kine ki mar kiba kynthup ia ki wait, ki tarik bad kiwei de ki tiar nep ha ki bynta jong ka thaiñ PB bad Jail Road, Shillong.
La iathuh ba kane ka jingdie madan ia kum kine ki jait tiar ka lah ban wanrah ka jingmynsaw haba ki nonglehkam sniew kilah ban shu shim kabu ia kine ki mar ban pynmynsaw ia ki nongshong dukan bad wat ia ki nongleit nongwan ruh.
Kumta ban kiar na kane ki bor pyniaid District lyngba ka District Magistrate kala pynmih ia kane ka hukum ka ban treikam noh mardor tad haduh ban da pynmih da kumwei pat.