U Deputy Commissioner, East Jaintia Hills District, Khliehriat ha ka jingpyllait khubor mynta ka sngi ula iathuh ba ia ka kyndon aiñ ba 25 bad 26 jong ka Water (Prevention and Control of Pollution) Act, 1974 la pyntreikam ha baroh ki bynta jong ka District da kaba khang ia kino kino ki kynja Karkhana, ne ka jaka pynkhuid ne pynlang jakhliah la ki dei ki ba dang thymmai ne kiba la don lypa kiba pynhap ia ki jakhlia jong ki sha ki um ki wah, khlem ka jingiohbor na ka ophis jong ka State Pollution Control Board.
Kumjuh ruh ia ka kyndon ba 21 jong ka Air (Prevention and Control of Pollution) Act, 1981 kaba la mana ia ka jingseng ia ki Karkhana ne kino kino ki jaka trei kiba pynjaboh ia ka lyer, khlem da ioh bor lypa na ka State Pollution Control Board.
Kumta u Deputy Commissioner ula pyntip ba ka Meghalaya State Pollution Control Board kala pynmih ia ka hukum sha baroh kiba don bynta ha kum kine ki kam ba ktah ia ki um ki wah bad ka lyer la kidei kiba la don lypa ne ki ban sa shna thymmai kum ia ki Health Care Facilities, Hotels, Restaurants, Automobiles, Repairing, Workshops/Servicing Centers bad kiwei ba ki dei ban da ioh bor shwa na ka Meghalaya State Pollution Control Board ban ioh bud ryntih katkum ki jingdonkam jong kitei ki ar tylli ki aiñ.
Na ka bynta ban ioh ia ki jingmynjur na ka Meghalaya State Pollution Control Board lah ban leit mih sha ka ophis treikam kaba don ha ‘Arden’ Lumpyngngad, Shillong ha kino kino ki sngi ba long trei lane da kaba leit ha ka website www.megspcb.gov.in.