Kum ka dak ban ai mynsiem bad ban kyrshan ia ki kam ba la synñiang da ki nongtrei jong ka Jowai Municipal Board (JMB), na ka liang ka Dorbar Shnong Mynthong mynta ka sngi kala pynkup burom ia kitei ki nongtrei ha ka jingialang ba lyngkot kaba la long ha Dorbar Hall jong katei ka shnong.
Kane ka dei ka sien kaba nyngkong ba ka DS Mynthong kan pynlong ia kane ka jingpynkup burom ia kitei ki nongtrei jong ka JMB kiba kynthup ia ki nongñiah kali bad ki nongpynlum pynlang ia ki jaboh kiba mih napoh ka sor Jowai.
Ha kane ka sngi la wan ban iadonlang da u ma F.War uba dei u Chairman ka JMB, u Executive Officer ka JMB u ma S Amse, u ma H. Passah Assistant Engineer, ki nongkitkam shnong, ki seng longkmie ba kiwei de.
Ha shwa ban sam ia ki jingai sngewbha la don ka jingialang ba la pyniaid da u Waheh Shnong ka Mynthong ma Lamphrang Pohktai, uba la pynsngew ia ki kam ba bha jong ki nongtrei ka JMB kiba la ai na ka bynta ka khuid ka suba jong ka sor Jowai wat hapdeng ki jingeh ba ia kynduh ha kine ki snem jong ka jingiakhun ia ka khlam Covid-19. Ula pynsngew ruh ba ki nongtrei ka JMB ki dei shisha ki nongtrei ba hakhmat eh ne ki Frontline Workers kumba long lem ki Doctor, ki Nurse, ki ASHA bad ki nongpathai khubor.
Na ka liang u Chairman ka JMB ha ka jingkren ula ai ka jingiaroh kaba khraw eh ia ka Dorbar Shnong Mynthong kaba la shim ia kane ka kam kaba khraw eh, na ka bynta ki nongtrei ka JMB kaba long ruh kum ka dak ban ai mynsiem halor ka kam ba kila trei met bad mynsiem. U la pynsngew ruh shaphang ki kam ba ka Jowai Municipal ka la leh na ka bynta ka bha ka miat jong ka shnong ka thaw, da kaba ong ba ka ophis ka la wad ki lad ki lynti kumno ban wanrah ban pynbha pynmiat ia ki nala um ki ju pyntuid ia ki jakhlia kiba don hapoh ka sor Jowai, kumjuh ruh ka ophis ka thmu ban wanrah ia kawei ka jingthmu na ka bynta ban pynkylla ia ki jaboh na ki septic tank katkum ka juk stad (Scientific) ba mynta.
Shuh shuh ka ophis ruh kala pynkhreh ban thied ia ka jaka bret ñuit ba pura da ka jingiasngewthuh jingmut lang jong ki nongdie bad ki nongshong shnong katkum ka jaka kaba la ibit kaba long jngai na ki shnong briew bad kumjuh na ki wah um. Ki don haduh 24 ngut ki nongtrei ka JMB kiba la shah pynkup burom bad kymjuh ia ki 2 ngut ki nongtrei ASHA jong ka Shnong.
Kiwei de kiba ai jingkren ki kynthup ia u ma S. Suting, ka President Seng kynthei jong ka shnong bad kumjuh na u Secretary Shnong ma R. Khonglah uba la ai ki kyntien pdiang sngewbha ia baroh kiba la wan sha ka jingialang katba ia ki kyntien ai khublei la ioh na u Asst Secretary Shnong ma D. Lathong.
