Mynta ka sngi na ka liang jong u ma Nehemaya Tyngkan uwei na ki kyrong ban iakhun ia ka elekshon MLA na ka 4-Mowkaiaw Constituency ryngkat bad ki paidbah jong ka thaiñ kila mih paidbah na ka bynta ban maramot ia ki bynta ba la sniew palat jong u Surok na Laskeiñ shaduh Lad Mooshrot, da kaba sdang shwa na ki bynta ka Lad Mooshrot.
Ki paidbah naduh ki longkmie ki longkpa bad ki khun samla ha ryngkat u mohkhiew bad ki tiar ba donkam kila iamih ban maramot ïa ka surok da kaba pyndap ïa ki thliew ki syar, ban kham suk ka leit ka wan jong ki paidbah na kane ka surok.
La ïarap ban pynbha ïa kane ka surok da kaba pyndonkam da ka JCB, ki trok bad ki kali Pick-Up ban kit ïa ka khyndew bad ki maw ban siang ïa ki bynta da long thliew ba heh bad hadien kane la pyndonkam sa ka Engine Road Roller ban pynmadan ïa kitei ki thliew ba la dep pyndap.
Naka liang u ma Nehemayah haba ai jingkren sha ki lad pathai khubor ula ong hadien ba la ïoh ka jingujor na kiba bun ba lang bad ka jingthut jong ka leit ka wan na kane ka surok, kumta ula shim khia ïa kane ka bynta da kaba sdang ïa ka jingmaramot surok mynta ka sngi.
Ula ïathuh da ki bun bun snem mynta la ieh sah khlem don satia ka jingmaramot thymmai ïa ka surok da ki bor ba dei peit, kumta katba dang mih ki sngi ka surok ka la nang jur nang jur ka jingsniew.
Ka shipor tang shi kynta ban ïaid na Sahsniang kumjuh na ki thaiñ Tum Tum, Khatkasla, Psiar Mushrot bad poi shaduh Jowai, hynrei na ka jingsniew ka surok kala shim por haduh ar kynta tam bad kane kala buh jingeh ïa ki paidbha. Kine ki bynta ba pynlong ïa ka jingmaramot kam duna ïa ka 20 KM bad ki shnong ki kynthup kumba 15 tylli, ong ma Tyngkan.
Ha ka juh ka por u ai khublei ïa ki paidbah nongkyrshan kiba la mih paidbah ban pyndep ïa kane ka jingmaramot surok haduh ban da poi ha shnong Laskeiñ.
Ula pyntip ruh ha ka 19 tarik u Nailar yn pynlong ïa kane ka juh ka jingmaramot surok sa ha shnong Psiar bad Khatkasla bad u kyntu ïa ki paidbah ban mih shakhmat ban ïashim bynta lang, namar ka surok ha katei ka thaiñ ruh kala sniew shaba palat.