Ka Rotary Club Jowai ha ryngkat ka Rotary Cyb Orchid City Shillong mynta ka sngi ka la pynlong Ia ka jingthung tynrai dieng ha ki bynta jong ka Da-Le-Mon-Ki’s St. Paul Secondary School, Mookaswan West Jaiñtia Hills District da ka jingiarap jong ka Mahindra Financial Services Limited.
Ka thong jong kane ka jingthung dieng ka long shi bynta na ka Project Hariyali da ka jingthmu jong ka Rotary Club International ban iada na ka jingkylla ka suiñ bneng (Climate Change) bad ban ai ka khubor sha kiwei de halor ka jingdonkam ban iada ia ka mariang bad ban pynjyrngam biang ia ki khlaw ki btab.
Hadien ba la dep ban thung ia ki tynrai dieng la don ka jingialang ba lyngkot hapoh ka jingpyniaid jong u President ka Rotary Club Jowai ma S.K Lato, uba la pynsngew ruh ia ki kam kiba ka RCJ kala leh na ka bynta ban leit thung ia ki tynrai dieng ha kylleng ki bynta jong ka District kum ha Khliehtyrshi, ha Loom Thang Khliehtyrshi, ha Bishop House Loombihsyntu Mihmyntdu bad ha kiwei de.
Kiwei de kiba la ai jingkren ki long u Rtn Vivek Kumar Project Chair jong ka Hariyali Project uba la iathuh ba kane ka project ka dei kaba la iarap da ka Mahindra Finance ha ki 3 tylli ki jaka kum ha East Khasi Hills. U la ong ruh ha kum kane ka por ba ka pyrthei ka ia kynduh jingeh na ka khlam Covid-19 bad kiba bun na ki nongpang ha kylleng ka Ri ki donkam ia ka Oxygen.
Kumta u la pynsngew ba ka jingdon ki dieng ka iarap ban pynmih ia ka lyer bad ka pyni tynnad ia ka mariang, ula kyntu ia iwei pa iwei ki nongshong shnong ban thung ia ki dieng bad sumar ruh ia ki. Ula iaroh ia ki bor pyniaid ka skul kiba la pynlong ia katei ka jaka kaba itynnad da ka jingdon ki dieng ki siej.
U Rtn James M Pohsngap President barim ka Rotary Club of Jowai u ong ka jingpynjyngam ia ki khlaw ki btab ka long ka bynta ba kongsan ban pynmih ia ki jingbam kumjuh ia ki um ki wah bad kan iada na ka jingkylla ka mariang, u ai nuksa ba kane ka jaka ba don ka skul ka dei kawei na ki jaka ba rit bad kaba pyngnad kaba lah ban khring ia kiba kwah ban wan shangkai namar ka jingdon ki dieng ki siej bad ka lyer kaba khuid.
Katba u Rtn. Vincent H. Darlong Vice Chancelor ka Martin Luther Christian University kum u kongsan haba ai jingkren ula ong ba ka kamram jong ki nongshong shnong jong ka Ri ka dei ban don ka jingkitkhlieh ban iada ia ka mariang, naduh ki wah um, ki lum bad ki dieng ki siej.