Ka jingrakhe jong ka ri India ia ka jingdap 75 snem ka jingïoh laitluid na ka jingsynshar donbor ki Phareng, ne “Azadi Ka Amrit Mahotsav” kala paw ba ka long kaba phuh ba phieng bha namar ka jingailad jong ka sorkar India ïa ki paidbah ban pynher ïa ka Lama lai rong ka Ri ha man la ki thliew ïing hapoh ka ri.
La sakhi ruh ba ha nongbah Jowai kane ka Lama lai rong jong ka ri kala kaweh ha manla ki thliew ïing namar ka jingiashim bynta long jong ki paidbah ban pynher ïa ka lama ka Ri bad kumjuh ha ki skul bad ki ophis sorkar bapher bapher.
Kiba bun na ka ïing briew ha Jowai kila pynïeng ïa ka lama Lai rong ha ki bynta ba ïohi briew bad ki don ruh kiba pynïeng ha tnum ïing ba shalor duh kaba la pynitynnad shuh shuh haba ka lama lai rong ka Ri ka kaweh.
Ha manla ki dong la sahkhi baroh ki rympei ïing kila pynher lut ïa ka lama ka Ri, ym don shuh wat tang kawei ka ïing kaba ïaid lait ïa kane kaba la pynphuh pynpeing kumjuh ïa ka shnong ka thaw kiba ki don ha manla ki dong bapher bapher ha Jowai. Kane ka jingpynher lama kala sdang naduh mynta ka sngi 13 tarik tad haduh ka 15 tarik u Nailar, 2022.
