Mynta ka sngi ka All Jaiñtia Muster Rolls Workers & Labour Union (CEC), ka la ioh ban pynlong ia ka jingiakynduh lang (7th Annual General Council Meeting) ha madan Mini Stadium ASSA Ladjaplem Amlarem Sub-Division, halor ka phang kaba ong “Leh bha katni u kune i ya ka mynried u chngaiñ, pateiñ u kyllep u sdep”.
La pyniaid ia ka jingialang da u President ka AJMW&LU Jowai Unit ma Phrangsngi Sutnga, la ioh ia ka jingkren pdiang da ka kong Dayoowanphi Iakai President AJMW&LU bad na ka liang ka tnad Labour la wan ban ai jingbatai bniah da ka kong Bethcy M Toi ka Labour Inspector, O/o ka ophis Deputy Labour Commissioner West Jaiñtia Hills District, Jowai.
Ka kong Bethcy M Toi ka la pynsngewthuh bniah shaphang ki lai jait ki skhim kiba lah ban ai jingiarap sha ki nongbylla sngi, kaba nyngkong ka dei ka e-Shram ha kaba ki nongioh myntoi ki long naduh ka rta 16-59 snem, da kaba register shwa ialade lyngba ki Common Service Centres (CSC) kiba don hajan da kaba pyndonkam ia u Aadhaar Card, EPIC, Passbook bad u Phone No.
Kaba ar ka long ka skhim Pradhan Mantri Shram Yogi Maan-dhan (PM-SYM) na ka bynta kito ki nongtrei bylla hapoh 40 snem ka rta bad ia kiba la palat 60 snem, ki lah ban ioh jingiarap kum ka bai bam tymmen kaba haduh 3 hajar tyngka shibnai hynrei lada khlad noh kiba ha ïing kin ioh 15 hajar tyngka ha ka shibnai.
Ka skhim kaba lai ka dei na ka bynta ki nongtrei Misteri bad ki lah ban ioh jingiarap da kaba wan register ha ka ophis Labour, kane ka skhim ka lah ban ai jingïarap haduh 5 lak tyngka lada jia ba khlad ha ka por ba don ha ka kam bad lada duna haki dkhot met na ki jingmynsaw kin ioh 1 hajar tyngka haka shibnai.
Katba na ka liang u ma Khroo L Pariat uba long u Adviser ka AJMM&WU (CEC) Jowai ula kyntu ia baroh ki nongtrei bylla sngi ba kin don ka jingiatylli ban pynduh pyndam noh ia ka kam bamsap kiba wan pynshoi na ki riewdonspah bad kiba khwan myntoi shimet.
Ula kyntu ruh ban pynduh ia kine ki kam sniew kynthup naduh ka jingdih buaid, ka jingkwah bor, ki kam awria bad kiwei ki kam sniew hapoh ka imlang ka sahlang khnang ban ioh ia ka shynshar ka khaddar kaba khuid ba suba.
Ha ka juh ka por u kyntu lang ban long kiba sumar ia ka mariang naduh ki um ki wah, ki lum ki madan, ki khlaw ki btap khnang ba ka pateng kan dang neh dang sah.
Haba pynkut ia ka jingkren u ong “Haba leh ia kino kino ki kam ha ka jingim dei ban leh naduh ka mynsiem” ba kan long kaba itynnad kaba lah ban pynhun ia kiba bun ba lang.
La iakren ruh ha kaba ia dei bad ka bainong jong ki nongtrei Mid Day Meal ban pynkiew noh ia ka honorarium ka jong ki na ka T.1000 sha ka T.5000 shi bnai bad ban siew 12 bnai ym shuh tang shi phew bnai bad ka jingiarap shuti haba pang ba shitom ia ki MDM Cooks cum Helper hapoh ka jylla.
Lada ka sokar kam jubab ia ka jingdawa hadien jong une u bnai Nailar, 2022 kiba la shah slem ia ki jingeh la 20 snem mynta kin pynlong syndon da ka jingiakhih ha nongbha Shillong.
La pynsngew ba ka Sorkar Meghalaya ka dei ban pyntreikam ia ka hukum ka Finance Department ban wanrah sha ka kyrdan Semi Skilled ia kito kiba la trei palat ia ka 5 snem kum ki muster roll.
Ha kane ka sngi la ioh ruh ban pynsngew ia ki kam na ki Unit bapher bapher kumjuh ia ka Annual Report na u D. N Suchiang General Secretary, AJMW&LU (CEC), ka jingioh bad jingpynlut bad kiwei kiwi de.
Ka jingialang ha kane ka sngi kala long kaba i shongkun bha namar ka jingwan shitrhem jong baroh ki para nongtrei bylla sngi na kylleng ka Ri-Lum Jaiñtia sha kane ka jingialang bah kiba kynthup naduh ki nongtrei Muster Rolls, ki nongshet ja Mead Day Meal (PM-Poshan), ki Mistery, ki nongshong dukan, ki nongdie kwai dong, nongsuhjaiñ bad kiwei de ki nongbylla bylla sngi. La pynshong shit shuh shuh ia kane ka jingialang da ki jingrwai ba la shim bynta na ki nong shet ja sngi ha ki skul kiba la rwai kyntu na ki nongmihkhmat ba kin sngew ia ki jingeh kaba ong “To Kynmaw lem ia ngi, to iarap ia ngi”, ka jingshad tynrai bad ka jingialehkai Skit.
