Ka jingleh Niam ia ka Behdeinkhlam ka Seiñ Raij Mukhla ka la sdang mynta ka sngi naduh ka por mynstep ha ïng Blei bad bud pat sa ka Dorbar Niam ha madan Ryngkew ha slot Masi.
Ha kane ka Dorbar Niam la pyniaid ia ka da u Pa Langdoh Niam ka Sein Raij Mukhla ha ryngkat ka jingiadon lang ki Waheh Sankur kiba long ki myntri jong u Pa Langdoh bad ha kane ka sngi la wan ban ia sakhi lang da u Rgh, Wailadmiki Shylla MLA uba long ruh u khun ka Seiñ Raij Mukhla.
Ha kane ka Dorbar Niam la ia kren ia ki kam Niam kiba ki khun ki hajar ka Seiñ Raij Mukhla kin pyndep lashai ha kaba ki khun ka Seiñ Raij Mukhla kin ia mih dang step ban leit sha khlaw ban leit pom ia ki Deiñkhlam artylli bad ki paidbah kin wan rah ia ki u wei na ka bynta ban seh (pynieng) ha Madan Tihkhyndaw bad u wei pat ban seh (pynieng) ha madan Ryngkew ha Slot Masi.
Kane ka jingleh Niam Behdeiñkhlam kala sdang naduh mynta ka sngi Pynsieñ bad kan kut ha ka sngi Muchai 23/08/2022 ha ka Biar ka Seiñ Raij Mukhla.
