Mynta ka sngi ki ar Chief Minister jong ka jylla Meghalaya bad Assam kila ioh ban ia kynduh biang sa shisien kaba dei ka sien kaba ar jong kane ka jingiakynduh kaba iadei bad ki kam khappud jong kine ki ar jylla.
Ia kane ka jingiakynduh la pynlong ha Secretariat jong ka jylla Assam ha nongbah Dispur, la synran lang ia baroh ki Chief Minister da ki Chief Secretary jong ki bad ruh ryngkat ki ophisar rangbah na baroh ar tylli ki jylla.
Ha ba kren sha ki lad pathai khubor hadien jong ka jingialng na ka liang jong u Chief Minister ka Meghalaya u Conrad K. Sangma ula ong ba hadien 15 sngi yn sa thaw ia ki Rogional Committee ban iakren pynbeit noh sa ia kiwei pat ki 6 tylli ki jaka kiba dang don jingiakhajia hapdeng kine ki ar jylla. Na baroh ar tylli ki jylla ki pyni ba don haduh 12 tylli kum kine ki jaka iakhajia pud.
U Sangma ula pynpaw jingsngewhun halor ka jingiasoi ia ka MoU halor kine ki 6 tylli ki jaka ba don jingiakhajia, ia kiba la dep ban iakren ha ka jingiakynduh kaba nyngkong bad ula pynpaw ruh ka jingaikhublei ia u Prime Minister ka ri u Narendra Modi bad ia u Union Home Minister u Amit Shah.
U la ong ruh ba baroh ar liang ki sorkar kila shikhia ban pynkut noh ia kane ka jingiakhajia pud hapdeng kine ki ar jylla kaba la kynjoh mynta sha ka 50 snem.
Ia kane MoU halor kitei ki 6 jaka la iasoi ha ka 29th March, 2022 ha nongbah New Delhi da baroh ar ki Chief Minister ha ka jingiadon ryngkat u Union Home Minister u Amit Shah.
Kumta long mynta na ka liang ka Survey of India ryngkat ka jingiatreilang ki ar jylla kila iaid shakhmat ban pynlong ia ka jingthew jingwoh, ia kaba la khmih lynti ba yn sa lah ban pyndep kloi katba lah, la ong shuh shuh u Sangma.
Kiwei pat ki 6 tylli ki jaka ba dang don jingiakhajia ki kynthup ia ka Khanduli & Psiar, Block I & Block II, Borduar, Langpih, Nongwah- Mawtamur bad ka Desh Doomreah. Ia ki Regional Committee yn khlieh da ki Cabinet Minister nabaroh ar liang jylla. Ka Karbi Anglong Autonomous District Council kan sa shah don bynta long ha kine ki Committee.
U Sangma ula ong ba na ka liang jong ki ar Chief Minister ruh kin shim khia da kaba leit jngoh sha kitei ki jaka na ka bynta ban wanrah ka jingiasngewthuh jingmut hapdeng ki nongshong shnong kitei ki jaka ba don jingiakhajia.
Khadduh ula ong ba baroh ar ki sorkar ki sngewkhia bha ia kane ka kam bad ki kloi ban thaw ki lad ki lynti na ka bynta ban pynduh noh ia kane ka jingeh jong ki nongshong shnong khappud hapdeng kine ki ar jylla ka Meghalaya bad Assam.