Ka Behdeinkhlam jong ka Raij Mukhla kaba ju long shisien shisnem ka la kut ha kane ka 23 tarik mynta u bnai ha ka jingiphuh iphieng ha kaba da ki hajar ngut ki paidbah kiba na jan bad na jngai ki la ia wan ban ia sakhilang ia kane ka Behdeinkhlam jong ka Raij.
U Myntri Rangbah ka jylla Meghalaya u Conrad K Sangma u la long u kongsan ha kane ka sngi pynkut ia ka Behdeinkhlam ka Raij Mukhla. Ha ka jingkren kyrkhu kyrdoh ia ki nongshong shnong jong ka Raij bad ia baroh kiba ia don bynta, u ong ka long kaei kaei kaba pynsngewtynnad ia u ka long ka jingthoh imsngi (motto) kaba ong “Yn nai ia u drugs” (Say no to drugs) bad ai ba kane ka ktien imsngi kam dei ban paw tang ha ka jingthoh hynrei da ka kam.
Nangta u ong ba ha kiwei ki ar snem kiba la leitnoh, ka Raij kam shym la iohlad ban rakhe ia ka Behdeinkhlam ha ka rukom kaba iphuh iphieng, hynrei mynta kila iohlad pat ban pyndep ia kane ka jinglehniam lehrukom kaba la ju pynmlien da ki mynbarim.
Nangta u ong ka rong Behdeinkhlam ka long kawei na ka jingleh jingkam jong ka Raij bad ka jaitbynriew kaba pynneh pynsah ia ka riti ka dustur kaba la saindur da ki longshuwa manshuwa jong ka jaitbynriew.
U la ong ruh ba hashwa un wan sha ka pung ait-nar (jaka nohrot) ha ka jingialam u President jong ka Raij, u la wan jngoh ia ka Yungblai jong ka Raij, ka ïing kala donkam ban pynbha pynmiat bad kaba donkam ia ka jingiarap bad kane ka jingiarap kam dei tang ia ka Raij Mukhla lane Jowai hynrei ha kiwei de ki Raij pynkut u Conrad K Sangma haba ai jingkren kyrkhu kyrdoh ia ki nongshong shnong ka Sein Raij Mukhla.
Kham hashwa la ioh ia ka jingkren kyrkhu kyrdoh na u ma Thombor Shiwat, u synbud kongsan uba long ruh u C.E.M jong ka JHADC bad ka jingkren pdiang sngewbha ia baroh da u ma Wailadmiki Shylla MLA ka thain uba long ruh u trai shnong jong ka Mukhla. Ha kane ka sngi la wanrah kumba 13 tylli ki rot raij kiba la pynriam pynbeit bha kum na ka dong Shoh Shrieh, Umlangshor, Ladmukhla, Lumpohshnong, Treksiar, Moothepkhla, Lumphyrnap, Wahshnong, Moolebnai, Neiñshnong bad na Nangbah.