Mynta ka sngi ka KSU West Jaintia Hills Unit kala phah ia ka khubor sngewlem sha kitto ki longïing kiba la shah pyniap dusmon ha ki riew thrangsnam kiba khlem da ñiewkor shuh ia ka jingim briew, tang hapoh shibnai kine ki riew thrangsnam kila ioh ban shim ia ar ngut ki mynsiem ba lui-lui.
Ym tang ba ki shim ia ka jingim hynrei wat ia ka kali ba ki kamai jakpoh ban bsa khun ruh kila shim bad kim don shuh ia katta ka jingiatiplem para briew. Te kum ka seng hi kala buh ka jingmaham kaba tyngeh
ia ki riew thrangsnam kiba kwah tang ban bam ei ia ka syep jong ki wei.
Ka seng ka buh ka jingduwai ia baroh ar tylli kitei ki long ïing kiba la mat ia kine ki jingjia ba sngewsih, naduh i lok, ki khun ki kti bad kiba don jingiadei baroh ba kin ioh ia ka jingpyntngen mynsiem na u Blei Nongbuh Nongthaw.
Ka seng kala ai khublei kyrpang ruh ia ka Police Department ba ka la shimkhia ban leh ia ka ba donkam, namar tang hadien katto katne sngi ki la lap ia ka metiap jong kine ki dribar kamai kiba la shah pyniap kane ka pyni ba ka tnad Pulit kaba la trei shitom shisha.
Ka seng kala kyrpad ruh ia ki paidbah khamtam ia ki nongñiahkali ba ki dei ban husiar bha khamtam ha kaba leit booking (reserve). Ka seng kala dawa ruh ia ki bor jong ka aiñ ban set phatok shi jingim ia kiba donkti ban pyniap ia kine dribar kali.
Ka seng ha ka juh ka por ka la pyntikna ban ai ka jingkyrshan ia kiba mat ne ia kynduh jingeh ha shiteng lynti, kam pher la ha ka por mynmiet ne mynsngi. Ka seng ka kyntu ia ki paidbah kiba shah pyndik ha lynti-syngkieng kin sniawbha ban ai jingtip mar mar sha ki nongialam ka KSU Jaintia Hills ha kano kano ka por ba ki ia kynduh ia ka jingeh. Kane ka long katkum ka kyrwoh bala phah da u Laitphar Syngkrem, President ka KSU WJHD Unit.