Ka All Jaintia Commercial Vehicle Association Ka ba dei ka seng jong ki nongkamai kali ka ba kynthup haduh 45 tylli ki Association jong ki kali kamai ki ba don hapoh Rilum Jaintia ( East & West Jaintia ) ka dap da ka jingsngewsih ka ba khraw ha ka jingiadei bad ka jingshah pyniap jong ki Arngut ki nongniah kali kamai tang hapoh shi taiew .Ka seng lyngba u president jong ka U Paila kordor Lyngkot ka pynrem jur ia kine ki riew thrang snam ki ba shim jyndat ia ka jingim balui lui jong kine ki arngut ki mynsiem ba kordor . Halor kane ka jingshah rahbor bad shah pyniap dusmon jong kine ki nongniah kali kamai , Ka seng ka kyrpad ia ki bor ba dei peit ban pynshitom ia kine ki riew khlaw nong pyniap briew da ka ba set phatok ia ki shi jingim .Bad Ka seng kan sa pyllong ruh da ka jingialang paidbah pyrshah ia kine ki nongpyniap briew ban pynbor ia ki bor ba dei peit ba kin pynshitom ia kine ki nongpyniap briew kat kum ki kyndon ain bad ban set phatok ia ki baroh shi rta , namar lada kine ki riew runar kin lait na phatok kan long ka jingma ka ba khraw ym tang ia ki nongniah kali hynrei wat ia ki babun ba lang ruh kumjuh.
Ha ka jingiadei bad ka tarik bad ia jaka pyllong jingialang yn sa pyntip paidbah ha kine ki khyndiat sngi ki ban wan namar ia kane ka rally pyrshah ia kine ki nongpyniap briew yn ia snohkti lang bad yn ia treilang da baroh ki seng Kamai kali ki ba don ha poh ka Jylla Meghalaya .Nalor ki 45 tylli ki Association ki ba don hapoh ka lama ka All Jaintia Commercial Vehicle Association , Yn ia trei lang ruh da ki seng bapher bapher kum Ka Hynniewtrep Taxi Association Shillong , Ka Joint Action Committee Riwar Mihngi Tourist Vehicle , Ka Mawkyrwat Tourist Taxi Drivers & Owner Association , Ka All Shillong Tourist Taxi Drivers & Owners Association, Ka Nongthliew Area Indica Owners & Drivers Association, Ka S.S.T.T.O.D.A, Ka Iatylli Tourist Owners & Drivers Association, Ka Nongstoin Shillong Ertiga Owners & Drivers Association, Ka All Meghalaya Tourist Taxi Welfare Association , Ka Sohiong Area Owners & Drivers Tourist Taxi Cab Association, Ka S.A.T.D.A, Ka Tyrsad Area Tourist Taxi Owners & Drivers Association bad kiwei ki wei ki Association .
Shuh shuh ka seng ka kyrpad ia ki khun ka Ri U Hynniewtrep ki ba don ka jingkitkhlieh na ka bynta ka Ri bad ka Jait bynriew ba kin sngewbha ban iawan shane ka jingialang paidbah ka ba yn sa pyntip hadien.