Ka Jaiñtia Student Movement (JSM), mynta ka sngi ka la pynlong ia ka jingsam khusnam kaba la tip kum ka 4th Academic Excellence Award 2022, sha ki samla ba pass bha ha ki eksam bapher bapher kiba kynthup ia ka SSLC, HSSLC, Graduate bad Post Graduate, kiba ioh 80% shaneng ki marks.
Ia kane ka prokram ai khusnam la pynlong ha Tpep-Pale Community Hall, Jowai, ha kaba u myntri ka tnat pule puthi u ma Lahkmen Rymbui u la long u kongsan, ha ka jingiadonlang ruh u Join Director of School Education & Literacy, In charge Jaiñtia Hills District bah L.S. Lyngdoh, ryngka u Leningstar Rymbai President JSM CB, Ribok Biam President Western Region, Heibormi Myrphet Educational Secretary, kiwei de ki nongialam bad ki dkhot ka JSM, JSM Women Wing, ki nongialam seng bhalang bapher bapher bad kiwei de ba shah khot sngewbha. Ia ka jingialang mynta ka sngi la pyniaid da u Jimmy Kharmuti, Working Prsident JSM CB.
Ka JSM ka la ioh ban pynkup burom haduh 26 ngut ki samla kiba la pyndep ia ka SSLC, 8 ngut ha ka HSSLC, 19 ngut ha ka Graduation bad 5 ngut ki dei ki dkhot jong ka JSM kiba pass ha ka kyrdan bapher bapher. Baroh ki samla kiba la shah pynkup burom mynta ka sngi ki don haduh 58 ngut kiba kynthup ia ki samla shynrang bad khynthei.
