Yn iaid rally ka AJCVA ha ka 1 tarik ban pyrshah ia ka jingshah pyniap ki Driver

Ka All Jaiñtia Commercial Vehicle Association (AJCVA) kan pyllong da ka jingiaid Rally paibah ha ka 01/09/2022 ha ka por 11:00 mynstep, ka ban sdang na Iawmusiang Jowai haduh Lad Kiang Nangbah College.
Ka jingkhot pynlong ia kane ka Rally ka long ban pyrshah bad ban pynrem jur ia kito ki nongpyniap briew kiba shim ia ka jingim jong ki ar ngut ki nongñiah kali kamai na Rilum Jaiñtia ha kine ki taiew ki ba lah dep.
Ka Association ka khot lang ia ki nongshong shnong jong ka Bri U Hynñiewtrep naduh ki nongsynshar shnong, ki seng bhalang, ki riew shemphang, ki Association, ki riew paw khmat bad ki paidbah ban ia wan sha kane ka rally pyrshah ia ki to ki riew khlaw ki ba shim ia ka jingim jong ki mynsiem ba lui lui.
Khatduh ka Association ka kyrpad ia ki bor ba dei peit ban shim khia ia kane ka kam namar lada kine ki nongpyniap briew ki ioh ban im lait lan shaei kan ialam ia ka Ri bad ka Jait bynriew? la buh jingkylli ka seng.