U myntri ka sorkar jylla uba dei peit ia ka kam poh iing bad kiwei, u ma Lahkmen Rymbui, mynta ka sngi u la wan ban plie ia u maw nongrim ban tei ia ka surok kaba don 5.14 Km kaba kynthup ruh ia ki ar tyllii ki jingkieng na ka shnong Kudengrim sha Kudengthymmai, ka shnong kaba don ha War Jaintia. Ia kane ka surok kaba wan lyngba ka New Development Bank, kaba shong dor Rs.17.6375 Klur tyngka. Ia kane jingplie ia u maw nongrim katei ka surok la pynlong da ka Chief Engineer (Standard), PWD (Roads), ryngkat ka tnat Tourism jong ka jylla. Mynta ka sngi la iadon lang ruh u B.P. Marak Chief Engineer (Standard), PWD (Roads), bah Cyril V. Darlong Diengdoh IAS, Director of Tourism Department, Waheh Shnong Kudengrim bad Kudengthymmai, ki nongtrei ka tnat PWD, Jowai ki nongshnong shnong bad kiwei.
U Myntri haba kren, u la ong ba lyngba ka jingtrei lang ki Dorbar Shnong bad ki ophisar bad ka sorkar la lah ban pynurlong ia kane ka sngi kumba long mynta kaba long ka sngi sah jingkynmaw, U la ong ban ioh ia kane ka surok kam long kaba suk ba naduh u snem 2019 ngi la wad ki lad ki lynti na kylleng bad ha kaba khaduh la ioh ia ka sanction ia kane ka surok mynta. U la ong lyngba kane ka surok kan pynjan ia ki nongshong shnong ka thaiñ ban poi sha ka iew Dawki, sha Nongtalang CHC, Nongtalang College bad sha duh sha sor Shillong.
U Director of Tourism Department u bah Lyngdoh haba kren, u la ong kumba tip ba kane ka thain bad ka shnong Kudeng ka don shi bun ki jaka ba itynnand kaba khring ia ki nongwan jngoh kai pyrthei da ka jingdon ki jingkieng jri, ki kshaid, fish sanctuary, tracking spot bad kiwei, kan pynsuk ia ki nongjngoh kai ban wan sha kane ka jaka hadien ba la depban shna ia kane ka surok bad sa kawei ruh kaba kham kongsan shuh shuh ka long ba lyngba kane ka surok kan rah shi bun ki jingmyntoi ia ki nongshong shnong ha ka jingiadei bad ka khaii ka pateng ka jong ki.
La pynphuh pynphieng shuh shuh ia kane ka sngi da ka jingrwai, jingshad jong ki khynnah skul kumjuh ruh ka jingshad tynrai ka shnong kaba la tip kum ka shnad Rong Khusi.