[S.D. Laloo]
Kumba la iatiplangba ka 5tarik August kadei ka sngi kyrpang sngi khraw ki nonghikai ha shityllup ka Ri ia kaba la tip kum ka Teachers Day, kumta kum ba long ha kiwei ki jaka ki khynah skul da ka jingsngewieit bad burom ia ki nonghikai ki la shim ban pynlong ki prokram bapher kumta ruh ka Shlem Hikai Tynre, Seinraij Jwai ha ka 4 tarik September ki la pynlong ia ka prokram kyrpang ha Seinraij Hr. Secondary School Jowai.
Ha ka jingialang ba i shongkun jong kane ka sngi ha ryngkat ka jingwansakhilang u Raymond Nartiang, PatorRaij Jwai ki nonghikai bad ki longkmie longkpa, u Budwanmi Dkhar bad ka Daman Lamar ki la long kum ki nongpyniaid katba ka Dasien Pakyntein ka la ai ki kyntien pdiang burom bud pat ka ngooh ka dem na ka Kongka Shylla bad haba kut pat kaWanchwa Sungoh ka la ai ki kyntien sngewnguh.
U Pa Dalloi ka Elaka Jwai Wh.Puramon Kynjin kum u Kongsan jong kane ka sngi ba long ruh u nongprat lynti ia ka Shlem HikaiTynre naduh u snem 1997 ha ba ai jingkren u la iaroh ia ka jingshimkhia ki khynnah ban pynlong ia kane ka sngi burom ia ki nonghikai kiba long kum ka Sharak ba ai jingshit bad jingshai ia ki khynnah shaphang ka tipniam tip rukom bad dustur riti.
Shuh shuh kum u nongprat lynti ka Shlem Hikai Tynre naduh u snem 1997 ryngkat ka jingiatreilang ki riew rangbah ka Seinraij da ka jingsngew sarong u ong ba kat nangmih ki sngi ki snem Ki Shlem Hikai Tynre ki la nangbun ha man ki Raij ki shnong bad kane ka long ka dak jong ka jingkyrmen ia ka ri bad ka jaitbynriew kumjuh ia ka pateng kaba dang bat rdin ban pynim pynneh pynsah ia ka niam ka rukom, dustur u Hynniewtrep Hynniewskum. Ki jait ialehkai kiba la pynshnongshit bad pynphuh pynphieng ia kane ka sngi ki long ki Shadrwai sur tre, Pule poitri bad pyniriam tynrai da ka jingshim bynta shongshit ki khynnah.
