U ma Wailadmiki Shylla, MLA ka 2-Jowai haba kren kum u kongsan ha ka sngi burom ia ki nonghikai ba 61 ha nongbah Jowai ula ong ba um lah ban ngeit ba ka jylla Meghalaya kan hiar shatraiduh ha ka pule puthi, u pynpaw ba ka ripot kaba la pynmih ha kine ki por ba la dep ka lah ban dei ka jingshim jingkheiñ kaba bakla nangno re nangno.
U ma Wailad ula ong ba kane ka ripot kam lah ban long kaba shisha, namar katkum ka jingiohi bad jinglap jong u ka jylla Meghalaya ka long hi kaba biang ha ka pule puthi. U ong ruh ba u don ka jingshaniah ha ki nonghikai bad u kyrmen ba kane ka khubor bala pynmih kam long kaba shisha, hynrei ha ka juh ka por u buh pat ka jingkyntu ia baroh ki nonghikai ba ki dei ban trei shitom met bad mynsiem ban wanrah ia ka jylla sha ka nam bad ka burom ha ka liang ka pule puthi.
Ula pynkynmaw ruh ba ki nonghikai ym dei tang ba ki ai ia ka jinghikai hynrei kila noh synniang ha baroh ki liang sha ki khynnah skul ne ki samla pule, kila long ki nongsneng nongkraw ki paralok ba iajan jong ki khynnah. U la sngewnguh ruh ia ka jingtrei shitom jong ki nonghikai ha ki snem ba wan lyngshop ka khlam Covid-19, ha kaba ki nonghikai kila hap ban shim da kiwei pat ki lad ai jinghikai sha ki khynnah kaba kim ju leh mynno mynno kata lyngba ka online Class kaba la iapher bak lbak na ka rukom ai jinghikai baroh shi katta.
Kane ka rukom shimklass ka la wanrah jingeh shibun khamtam ia kito ki nonghikai kiba la heh ka rta ki bym ju mlien ban bat ne pyndonkam ia kita ki Screen touch Mobile. Pynban wat lada ka long kaba eh hynrei baroh ki nonghikai ki la trei shitom ban pyndep hok ia ka kamram jong ki la ong shuh shuh u ma Wailad ha ka kajuh ka por u kynta ia ki nonghikai ba kin long ki nuksa kiba bha ia la ki jong ki khynnah skul.