Ha ka jingrakhe ia ka National Teachers’s Day kaba 61 hapoh ka ri India mynta ka sngi na ka liang jong u Prime Minister ka ri India u Narendra Modi ula pynbna ia kawei na ki skhim jong ka sorkar pdeng ia kaba la tip kum ka PM SRHI Schools (PM ScHools for Rising India) ka ban pyntreikam ha palat 14,500 tylli ki skul ha kylleng ki bynta jong ka ri India.
Kane ka skhim ka long shi bynta ban pynkiew kyrdan bad ban pynbha shuh shuh ia ki skul kiba la don lypa ki lah ban dei kiba pyniaid da ka sorkar kmie, ka sorkar jylla, ki sorkar UT lane ki skul ban pyniaid da ki kynhun seng. Lyngba kine ki skul yn sa pyntreikam pura ia ka National Education Policy 2020 bad kin long kum ki nuksa ia kiwei pat ki skul hapoh ka ri.
Ha kine ki skul yn pynbiang ia baroh ki jingdonkam katkum ka juk ba mynta kiba kynthup naduh ki Labs, ki Smart Classrooms, ki Libraries, ki tiar Sports, ki arts Room bad kiwei de. Ia kine ki skul yn tip ruh kum ki Green School namar yn pynbiang ha ki ia ka rukom pynlang ia ka um, ka jingpynkylla dur ia ki mar kiba la bret, ka jingpynbiang ia ka bor ding bad ruh ban pyndonkam ia ki jinghikai tynrai ha ka bam ka dih bad ka thung ka tep bad ka jinglong jingim.
Kine ki skul kin long ki nongialam lynti ia kiwei pat ki skul kiba don ha ki thaiñ jong ki ban pynioh ia ka jinghikai kaba bha tam, kaba mar ia ryngkat, ka jingpule kaba sngewtynnad ha baroh ki liang, kumba la kdew ha ka NEP 2020.