Ia ka sngi burom Nonghikai kaba 61 la rakhe ruh ha East Jaiñtia Hills District mynta ka sngi bad ia ka jingialang la pynlong ha Khliehriat West Community Hall.
U ma Kyrmen Shylla, Myntri ka tnad Social Welfare, Revenue bad Disaster Management etc. u long u kongsan, ha ka jingiadon ryngkat u Deputy Commissioner ka District u Abhilash Baranwal, IAS kum u symbud kongsan bad u ma O. Sumer, BMC Saipung Block, kong T.R. Challam, BMC Wapung Block, u ma S. Gympad, Sub-Inspector of Schools, Khliehriat bad u Dr. P. Nongtdu, Principal, Jaintia Eastern College.
U ma Kyrmen haba kren ha ka jingialang u ong ba ia kane ka sngi burom jong ki nonghikai la rakhe ha manla u snem na ka bynta ban aiburom ia ka jingnohsynniang jong ki sha ka imlang ka sahlang bad ruh ban burom halor ka jingshimkhia jong ki ha ka sneng ka kraw bad ka jingai jinghikai ia ki khynnah skul. U la kyntu ia baroh ki ba don bynta ha ka kam hikai ba kin iatreilang bad ki bor District na ka bynta ban shakri kham bha shuh shuh ia ki nongshong shnong jong ka District. Kumjuh ruh u ma Kyrmen ula iaroh ia u DC ka District uba hapoh ka jingialam jong u la lah ban wanrah shibun ki jingbha bad jingroi naduh ka liang ka kam sports, ka kam pule puthi bad kiwei de.
Na ka liang u Abhilash Baranwal, IAS, Deputy Commissioner ka East Jaintia ula ong ba kane ka sngi burom nonghikai ka dei shibynta ka jingkynmaw burom ruh ia ka sngikha jong u Vice-President ba nyngkong duh jong ka ri India u Dr. Sarvepalli Radhakrishnan. Ula pynkynmaw ruh ba ki nonghikai ki don ka bynta kaba khraw ban wanrah ka jingkylla ha ka imlang ka sahlang lyngba ka jingtrei shitom jong ki. U ong ba ka kam nonghikai ka dei ka kam kaba donburom tam, kumta u ong ba ka long kaba shong nongrim ba ki nonghikai kin ioh ka jingiaroh bad ka jingburom na ka imlang ka sahlang.
U ma Kyrmen ula sam ruh ia ki khusnam District Award sha ki nonghikai ba kynthup ia ka kong Tasiana Kympat, B.A (Hons) B.Ed, Asstt. Teacher, Tluh Secondary School, ka kong Draitis Paslein, Asstt. Teacher, Pala U.P. School bad ka kong Rufina Kyndait, Asstt. Teacher, Dkhiah Government L.P. School.
Katba na ka liang jong u DC ula ai khusnam sa u Mondaystar Nongtdu, Asstt. Teacher Sutnga Government UP School kum u Best District Scout bad ia ka kong Laxmi Sarkar, Asstt. Star Public School, Lumshnong kum ka Best Guide Captain.