U Myntri ka C&RD u bah Hamletson Dohling mynta ka sngi ha ka jingiadon ryngkat u MLA ka Nongkrem Constituency u bah LamborMalngiang ula buh ia u maw nongrim na ka bynta ban tei noh ia ka ïing treikam ba thymmai jong ka Mylliem C&RD Block ha 5-Mer, Upper Shillong.
U bah Dohling haba kren ha kane ka jingialang ula ong ba ki ophis Block ki long kum ka jingkieng kaba pyniasoh ia ka sorkar bad ki paidbah, namarkata ka long kaba donkam haduh katta katta ban pynbiang ia ki jingdonkam khnang ba kine ki ophis kin lah ban ai ka jingshakri kaba bha tam ia ki nongshong shnong ka thaiñ.
Ula pynkynmaw ruh ka na ka liang ka sorkar kala mang pisa haduh T.120 klur tyngka na ka bynta ban pynbha haduh 40 tylli ki Block ophis kiba don ha kylleng ki bynta jong ka jylla bad kine ki Block ophis kin ioh mar T.3 klur tyngka. Napdeng kine 6 tylli kidei kiba la dep ban trei haduh mynta.
U bah Dohling ula iaroh ruh ia ka jingtrei shitom jong ka Block Mylliem kaba la ai jingiarap shibun ia ki nongrep lyngba ki SHG. Ula iaroh ruh ia ka jingtrei shitom jong u BDO barim u bah P.T. Passah bad ula pdiang burom ruh ia u BDO ban shimti thymmai u bah Andrew Myrthong.
Kiwei de kiba ai jingkren ki kynthup ia u bah Lambor Malngiang bad u SC Sadhu, Director C&RD Department.
