U Deputy Commissioner, ka West Jaiñtia Hills District, mynta ka sngi ula pynmih hukum ha kaba iadei bad kiba shong die jingdie ha ki lynti iaid kjat paidbah (footpath) bad ha ki rud surok.
La ong ruh ba kane ka rukom shong die jingdie beaiñ ki nongdie madan ha sor Jowai ka la buh jingeh bad buh jingma ia ki paitbah namar kim ioh lad shuh ban iaid ha ki lynti iaid kjat hynrei ki la hap ban iaid ha pdeng surok, kane ka la wanrah khamtam ia ka jingdheng kali khah khah hapoh sor Jowai bad ka lah ruh ban wanrah ia ka jingjia aksiden namar ka jingkhapngiah palat ka surok.
Kumta na ka liang u Deputy Commissioner u la hukum ia baroh ki nongshong die jingdie madan ba naduh ka 15 tarik u Nailur 2021 kim bit shuh ban shong die jingdie ha ki lynti iaid kjat lane ha rud surok khnang ba kan pynsuk ia ki paitbah kiba iaid ba ieng. Lada don kino kino kiba ialeh pyrshah kin shah pynshitom katkum ki kyndon aiñ. La lap ruh da ki bor pyniaid District ba ki paitbah kim shym bud shuh ia ki kyndon lane ki protocol Covid-19 ha kine ki khyndiat sngi, kumta la bthah ia baroh ki nongshong shnong ba kin long kiba husiar bad ban bud rynti ia ki kyndon jong ka tnad ka koit ka khiah.