Mynta ka sngi ka Meghalaya Trinamool Congress Students’ Union (MTMCSU) kala pynlong ia ka jingshong shahthngan kaba shi sngi kum ka dak jong ka jingdawa na ka sorkar ban pynioh ia ka jingthung kam kaba khuid ba suba lyngba ka tnad MPSC, ha ka juh ka por ruh ban pyrshah ia ka jingbym pynmih kam sorkar kane ka sorkar ba mynta.
Ia kane ka jingshong shah thngan la ialam da u President ka MTMCSU u samla Bansharailang Pyngrope bad la pynlong ha khmat ka ophis treikam jong ka MPSC ha nongbah Shillong.
Kine ki samla kila kynnoh ia ka jingslem palat jong ka sorkar ban khot ia ka jingthungkam lyngba ka MPSC bad ka jingkhot thungkam kaba khadduh eh ka dei jong u snem 2019. Nalor kata ka jingbym pat lah jong ka sorkar pynlong ia ka Exam na ka bynta ki 328 tylli ki post kiba la dep ban advertise naduh ka 14 tarik u December 2020 haduh mynta.
Haba thad madan ia ka jingbamsap hapoh ka sorkar MDA ba lam khmat da ka NPP u Bansharailang ula ong ba u Chief Minister ula dep ban pyntip hapoh ka ïing Dorbar ba ki don haduh 2000 tylli ki post na ka bynta ka kam Police, hynrei haba ia kren markhmat bad ki samla pat ula ong ba ki don tang 800 tylli ki post kiba lait.
Na ka liang kine ki samla ki dawa ruh ba dei ban don noh ka jingpynbha ne pynthymmai ia ka rukom thung kam lyngba ka MPSC da kaba bud ia ka rukom bal eh da ki State Bank Examination bad ki SSC, khnang ban lait na kano kano ka jingthungkam sop sop.
Khadduh eh na ka liang ka Meghalaya TMC kan iaid bteng ia ka jingdawa kat haduh ba ki nongshong shnong ka jylla kin lait na kane ka jingleh donbor jong ka sorkar MDA la ong kitei ki nongialam.