U Executive Member (EM) ka JHADC ba dei peit ïa ka tnad Market bad kiwei u ma Eveningstar Teron hynnin ka sngi ula plie paidbah ïa ka ophis treikam jong ka Managing Committee Ïew Namdong, haka jingïalang kaba pynlong ha katei ka ïew ba don ka ophis bad ïa kane ka ophis la tei ha ka jingpynlut pynsep bala pynmih hi da ka ‘Managing Committee’ kaba la kot kumba 2 lak tyngka.
Ha kane ka sngi ïa ka jingïalang la pynïaid da u ma Isidorus Pakma Secretary jong ka Raij Namdong, ha ka jingdonlang u MDC ka thaiñ u ma Dawan Lyngdoh kum u symbud kongsan, ma E.S Shylla T.I. JHADC, ka kong C. Dkhar Special Officer, u Dolloi ka Elaka Nongjngi ma Copiusnes Daw ki Waheh Shnong ba marjan bad ki paidbah nongleit ïew leit hat.
Hashwa ban khap ïa u ribon jong katei ka ophis treikram ka Managing Committee na ka liang u kongsan haba ai jingkren ula kitbok kitrwiang ïa ki nongpynïaid ka Committee ïew hapoh ka shnong ba kan nang ïaid shakhmat ban pynbha pynmiat ïa jingdonkam ha baroh ki liang. Ula ong ba ‘Dei lyngba ka jingtrei shitom jong ki nongpynïaid ka Managing Committee la lah ban plie ïa kane kane ka ophis khlem da don ki lad jingïarap na ka sorkar ne ki briew shimet bad kane ka pynpaw ïa ka jingtrei shitom jong ki nongïalam ka Managing Committee’.
Ha kaba ïadei bad ka jaka pynïeng kali (Parking lot) ha kane ka ïew ula pyntip ba ka JHADC ka dang ap ïa ka pisa na ka Fund jingïarap na ka sorkar ban sdang ïa ka kam, ula pynsngew mynta ka don sa ka jingïarap pisa naka sorkar lyngba ka Fifteenth Finance bad ka SAG na ka sorkar kaba lah ban ai jingïarap ïa kine ki ïew hapoh ka District, ula kular ban ïakren hapoh ka Executive Committee na ka bynta ki jingdonkam jong kane ka ïew.
U MDC ka thaiñ ma Dawan Lyngdoh haba ai jingkren ula kular ban ai jingïarap ïa katei ka ïew Namdong da ka pisa kaba 1 lak tyngka sha ka Managing Committee ban pynshna ïa ka Paiñkhana ha katei ka ïew khnang ban ïoh pyndonkam ki nongleit ïew leit hat bad ki nongshong ïew kumjuh. Baroh ki nongkren ha kane ka sngi kila pynpaw ka jingai khublei ïa ka jingtrei shitom jong ka Managing Committee, kila la lah ban pynurlong ïa kane ka jingdawa ban donkam jong ka ophis treikam ban pynsuk ïa ki kam ïew kam hat.
Na ka liang ka Managing Committee kala aiti ruh ïa ka Memorandum halor ki jingdonkam jong ka ïew ha utei u MDC ba dei peit ïa ka tnad Market ka JHADC.