Uwei naki 6 ngut ki koidi kiba lait phet na District Jail Jowai, kaba la jia ha kane ka sngi saitjain 10.09.2022, uba la tip kyrteng kum u Rikmenlang Lamare, mynta ka sngi la ioh ban kem ia u na kawei ka shnong Shiabnai, West Jaiñtia Hills District, ha kaba la ioh ban kem ia une u koidi da ki VDP ka Barato ha ka jingdonlang ki dkhot ka Hynniewtrep Integrated Territorial Organisation (HITO) Barato Area, haka por kumba 11 baje ei ei hynne ka step jong ka 13.09.2022, na kawei ka iing.
Mynta ka sngi ha katei ka jingleit kem ia utei u koidi ba lait phet la lam khmat da u Secretary ka VDP Barato-B ma Resto Sten, uba long ruh u President ka HITO Barato Area, ha ka jingsynran lang ki dkhot ka VDP ka Barato. Ha ka jingiadei bad ka jingioh kem ia une u runar ba la thwet jur da ki Pulit, na ka liang ki VDP ki la ai khublei ia u Waheh Shnong, Secretary Shnong, kiba la ai jingtip bana liet kem ia utei u ba lait phet na phatok.
Kumta ha ka jingiadei bad ka jingjia lait phet ki 6 ngut ki koidi na phatok Jowai haduh mynta ka sngi napdeng kitei ki 6 ngut 4 ngut ki la khlad ha ka jingshah bom ha ki paidbah ha ka sngi U Blei kynthup ia u I Love You, katba ia u Ramesh Dkhar la ioh kem hynnin ka sngi 12.09.2022, ha ki thaiñ jong ka khlaw Muthlong bad Shangpung uba la aiti ruh sha ki pulit bad mynta ka sngi pat la ioh ban kem sa ia u Rikmenlang Lamare.