Ki nongialam shnong ka Dorbar Shnong Thangraiñ, Elaka Shiliangmyntang, West Jaintia Hills hapoh ka jingialam jong u Waheh Shnong ma Pyrkhatbhami Sungoh, ha ryngkat ki samla shnong bad ka KSU Thangraiñ Unit ba la ialam da u samla Hababiangki Biam, President, kila wan ban pynshai paidbah mynta ka sngi (13/9/2022) halor ka jingmih kyrteng khlem nongrim jong ka shnong Thangraiñ ha ki ladpathai khubor katkum ka jingkren jong u Home Minister ma Lahkmen Rymbui hapoh ka ïing Dorbar thawaiñ ka jylla.
Na ka liang jong ka Dorbar Shnong Thangraiñ bad kine ki nongialam seng kila pynpaw ia ka jingsngewsih bad pynrem jur halor kane ka jingpynmih kyrteng kulmar jong u Home Minister ia ka shnong Thangraiñ hapoh ka ïing Dorbar Thawaiñ ka jylla (Assembly) ba u ong ba u Shidorki Dkhar uwei na ki saw ngut ki koidi bala shah bom iap ha ki paidbah u dei na ka shnongThangraiñ. Kane ka jingpaw kyrteng jong ka shnong Thangraiñ hapoh ïing Dorbar bad sha ki lad pathai khubor kala pynjah burom shikatdei eh ia ka shnong la ong u Waheh Shnong ma Pyrkhatbhami.
Kumta na ka liang kitei ki nongialam shnong kila buh ka jingkyrpad ia ka Sorkar bad ruh ia u Nongmihkhmat ka thaiñ ba un sngewbha ban un iarap pynshai lem hapoh ka ïing Dorbar ba u (L) Shidorki Dkhar um dei satia na ka shnong Thangraiñ kumba la kynnoh bad ha ka juh ka por kila dawa ba dei ban weng ne pynduh noh ia ka Record ha ka Bui sorkar bala shim halor ka jingkren jong u Home Minister hapoh ka ïing Dorbar Thawaiñ.
Kumta sa shisien ka Dorbar Shnong Thangraiñ ka buh ka jingkyntu ia baroh ki paidbah nongshong shnong ka Jylla ba kim dei satia ban pdiang ia kane ka jingialambakla jong u Home Minister bad kum ka shnong ka pynshai ba kam don jingtip ne jingithuh ei ei ia utei u (L) Shidorki Dkhar bad um don jingiadei ei bad ka shnong Thangraiñ.