Da ki hajar ngut ki paidbah nongshong shnong ka thaiñ Nartiang Khanduli kiba don ha ka Joint Action Committee (JAC) Nartiang Khanduli Area, ba kynthup ia ki sengbhalang bapher bapher, lem bad ki khynnah skul ki nonghikai na ka shnong Namdong, ki la pynlong ka jingmih paidbah ha ka shnong mynta ka sngi ha ka shnong Namdong-B kum ka dak ban pynrem jur bad dawa na ka aiñ ban pynshitom ia u Tellme Pyrtuh ba ju khot sin u Bor Pyrtuh uba dei u nongshong shnong ka shnong Namdong-B bad uwei na ki 4 ngut ba shah kem uba donkti ban pyniap ne shim ia ka jingim jong ki ar ngut ki nongniah kali kamai.
Ha kane ka sngi ki paidbah kila iamih ha ryngkat ki jingthoh ha ki placard bad banner, kiba pynpaw ka jingpynrem bad ka jingdawa ban pynshitom da kaba rai pynrem ia Bor Pyrtuh.
Na ka liang jong ka kmie u Bormi Pyrtuh ka kong Soiloda Pyrtuh kaba la ai jingkren ryngkat ka jingsngewsih kthang halor kane ka jingleh jong u khun. Ka la ai ka jingkyrshan ba pura ia kane ka JAC bad Shnong Namdong, ka la ong wat la ka long kum ka kmie jong u ruh hynrei kam banse shuh ban pynrem ia la u khun jong ka namar ki kam runar jong u kiba long pyrshah ia ka imlang sahlang bad ka dawa jur na ki bor jong ka aiñ ba ka dei ban set phatok shi jingim ia u.
U Waheh Shnong Namdong u ma Damian War, u la ong ba ka jingleh jong kine ki riew thrang snam ka pynsyier ia ka ri bad ka jaitbynbriew khamtam ki nongshong shnong sha kane ka thaiñ ki bym juh don ka jingtieng jingsyier wat lada sahmiet ha ki lynti syngkieng ruh.
Kiwei de kiba la ai jingkren ki long u President ka KSU Nartiang Circle u samla Chanbor War, u Waheh Shnong ka Moodop Nartiang u Damon Dkhar, u General Secretay KSU, Lapangap Unit u Augustang Timung. La ioh ruh ka jingkren na ka liang ka kur da u Mantre Pyrtuh, ki nongniah kali kamai ka thaiñ kumjuh naki Waheh Shnong bapher bapher kiba don hapoh ka JAC Nartiang Khanduli, ki longkmie bad kiwei de, ia ka jingialang la pyniaid da u ma Icydol Pakma.
