Ka jingdon jong ka Dispensary kum ka jaka ai dawai ha ka shnong Barato, West Jaiñtia Hills District kaba don ha ‘U Khrist Syiem Barato Parish’ ïa kaba la ïarap ban wad pisa lyngba ka Society of St. Vincent de Paul, Jowai Area Council, kala long ka jingmyntoi kaba khraw eh ïa ki paidbah nongshong shnong ha kitei ki thaiñ kiba donkam jingïarap ha ka liang ka koit khiah.
La ïathuh ba ïa kane ka Dispensary Barato la shna ïa ka lyngba ka skim SAG jong ka JHADC bad la plie paidbah ïa ka ha ka 26.02.2022 da u MDC ka thaiñ u ma Aiborlang Shadap bad kane ka jaka ai dawai kala ïaid lynti mynta tang hapoh 7 bnai hynrei kala lah pat ban ai jingsumar ïa kiba wan shim dawai na ki shnong bapher bapher kaba la kynjoh sha ka 5526 ngut hynduh mynta ka sngi la ïathuh ka sister ba dei peit ïa ka Dispensary ka Cecilia F. Basamotang.
Na ka liang u ma M.M. Thaiang uba dei u President ka Society of St. Vincent de Paul, Jowai Area Council ha la jingleit jurip jong u ïa kane ka Dispensary hynnin ka sngi 14 tarik, ula ai ka jingïaroh ïa ka Sister kaba la trei shitom ban pynïaid shakhmat ïa kane ka Dispensary. U la ong ba ka jingdon kane ka jaka ai dawai kala long ka jingmyntoi kaba khraw eh ïa ka shnong Barato bad kumjuh ïa ki shnong ba marjan jong kane ka thaiñ.
