Ka seng JSU kum shibynta ka jingiaid lynti sha u mawmer ka jingdap 50 snem ka la pynlong shi bun ki jingialang ki jinglehkai sports bad kiwei kiwei ban lehkmen ia ka jing iaid lynti ban pynkut iaka jinglehkmen 50 snem ha ka 18 tarik u bnai December mynta ka snem.
Ka JSU lyngba ka Khliehriat Circle, ha jingiatrei lang bad ka ophis u DC bad SP East Jaintia Hills mynta ka sngi ka la pynlong ia ka prokram ban ai jingpynsngswthuh sha ki khynnah pule jong ki skul kiba don hapoh ka thaiñ East Jaiñtia Hills ba la wan iashim bynta da ka St. Anthony’s College Byndihati, Khliehriat Higher Secondary School bad kiwei de.
Ia ka prokram la pynlong ha ka Hall jong ka St.Anthony’s College Byndihati. Ia ka jingialang la pyniaid da u General Secretary seng kmie u samla Treibor R. Suchen bad lah ioh jingkren maitphang na u President samla Livinson Sama bad lah ioh jingkren na i kongsan i kong F. Wann, MCS, EAC DC office bad lah ioh ruh ka jingkren na u symbud kongsan u ma S.Thamar, SI Khliehriat Police Station bad ka jingkren pdiang burom na u Father George Lyngkhoi Principal ka St.Anthony’s College bad na u President seng kmie u samla Jersom Shylla.
La ioh ia ka jingkren pynsngewthuh sha baroh ki khynnah skul bad ki samla pule halor ka phang pdeng jong ka prokram “A drug free society” lane ka “Imlang Sahlang ba lait na u drugs” da i kong kong Rinibeth Patlong iba long i Program Manager MCSWA TI CC Khliehriat na ka Mihmyntdu Community Social Welfare Association (MCSWA) bad na u ma Heibor Pariat u nongtrei barim ka Voluntary Health Association Meghalaya (VHAM).
Ia ki kyntien ai khublei la ai da u President ka South Border Zone u samla Ajoyminson Lyngdoh.
Na ka liang ka JSU kan nang iai pynlong shuh shuh ia kum kine ki prokram ha kylleng ki bynta jong ka Ri Lum Jaiñtia khnang ba yn lah ban teh lahkam ia ka jingkyrñi ha ki kam dih drok ka ba ktah ia ka imlang ka sahlang bad ia ka thaiñ bad hapoh ka jylla hi baroh kawei.
