Ka jingpynmih hukum jong u DC, West Jaintia hynnin ka sngi kala wanrah shisha ka jingkylluid jong ki lynti iaid kjat (Footpath) kiba don ha ki bynta jong ka Iawmusiang naduh na khmat DC office ter ter shaduh sha ophis DI barim haduh jan skul HK Singh ha kaba la lap ba ki long kiba la kylluid mynta ka sngi namar ba ym don shuh ki nongshong die jingdie, hynrei ka don pat ka jingshim kabu da ki katto katne ki kali jong ki riew shimet kiba la pynieng (parking) ia ki kali jong ki halor jong ki footpath.
Na ka liang ki paidbah nongleit nongwan, khamtam ki kynnah skul kila pynpaw ka jingkmen ban iohlad ban iaid lyngba ia ki footpath, khnang ba kan long ka jingiada ia ki na kano kano ka jingtakhuh kali. Ha ka juh ka por ka long ruh kaba ikhuid isuba haba ym don ki nongshong die jingdie ha kine ki footpath la pynpaw uwei u rangbah.
Na ka liang ki riew paidbah ki buh ka jingkyntu ia u DC bad ki bor pulit ban shimkhia ban pyrkhing shuh shuh nangne shakhmat khnang ban ym don kino kino ki nongdie jingdie ki ban shong ha kine ki lynti iaid kjat. Ha kajuh ka por ruh ki kyntu ia ki bor jong ka aiñ ba ki dei ban pynshitom ne ai jingsneng ia kito ki kali jong ki riew shimet kiba ju mlien ban pynieng halor ki footpath kiba la khang lynti bad pynwit ia ki nongleit nongwan lyngba kine ki footpath.
