Ka Hynñiewtrep Integrated Territorial Organisation (H.I.T.O) Saphai Area mynta ka sngi hapoh ka jingialam u President u Pynhun Shulet ha ryngkat ka jingiadon lang u General Secretary Melki Dhar bad u Public Secretaty Jemi Phadong ka la leit jurip (inspect) ia ka skul Saphai Pohrtiang Government Primary School.
Ha kane ka jingleit peit bad jurip ka seng ka la lap shibun ki jingduna, naduh ka ing skul kaba la orpait, ki tin kiba la pei thliew, ki ben ruh dang duna, kaba pynlyngngoh shuh shuh ia ka seng ka long namar naduh ba sdang ia katei ka skul ha u snem 1978 wat tang ka kamra ne ka ophis na bynta ki nonghikai ruh kam don ha katei ka skul, ka seng ka la ioh ruh ban iakren bad ka Head Teachers jong katei ka skul na ka liang jong ka ruh ka la ong ba ki la dep ban phah shithi sha ka sorkar bad ki la don ruh ha ka list ban maramot ne repair ia katei ka skul hynrei haduh mynta ym pat sdang ban repair ne maramot ia katei ka skul.
Ka seng ka iathuh ruh ba kane ka skul ka don tang saw ngut ki nonghikai namar ba naduh ba la shongthait ka wei na ki nonghikai bad ka post ka la long thylli haduh mynta. Ka seng ka dawa na ka sorkar ba kan pynkiew kyrdan noh ia ka ne ka skul sha ka Upper Primary bad ka dawa ruh na ka sorkar ba kan peit lem ia ki skul sha ki thaiñ nongkyndong khnang ba ka pule puthi kan kiew wat sha ki thaiñ nongkyndong ruh.
