U MLA ka Jowai Constituency ma Wailadmiki Shylla mynta ka sngi ula plie ia ka Auditorium jong ka Ches’ Stars Higher Secondary School kaba don ha Chutwakhu Jowai, lyngba ka jingdon jong kane ka Auditorium kan iarap shibun eh ia ka skul ba kan ioh ban pynlong ia ki prokram bad ki lad ai jinghikai bapher bapher.
Ha kane ka sngi la wan ban iadonlang da u Deputy Commissioner ba thymmai ka West Jaiñtia Hills u bah B.S Sohliya, ka District School Education Officer ka kong A.P Syiem, u President jong ka skul u ma S.Laloo, ki nonghikai, ki khynnah skul bad ki kmie ki kpa, nalor kiwei de kiba la shah khot sngewbha, katba ïa ka jingialang la pynïaid da u R. Shullai bad ka K. Rapthap.
La sdang ia ka prokram da ka jingpule ia ka ktien u Blei bad duwai na ka kong D. Suting la pynphuh pynphieng ia kane ka sngi da ki jingrwai bad ki jingshad tynrai da ki khynnah pule jong ka skul. Katba ia ki kyntien ai khublei la ioh na ka Principal jong ka skul ka kong I.J Chullai.