Ka kynhun jong ki samla ka Shnong Iooksi Pyllun kiba kynthup ia ka Iooksi Iapkhla, Iooksi Priang, Iooksi Umdeinlin, Iooksi Kyanmynsar bad Iooksi Tongkiad ki la ia lum lang ha Community Hall jong ka Iooksi Thlongmoo hynnin ka sngi, na ka bynta ban ia pyrkhat ia ki kam kiba iadei bad ka jingthmu iakhun Elekshon jong u ma Nehemaya Tyngkan.
Lah ban pynkynmaw ba u ma Nehimaya Tyngkan udei u kyrtong jong ka Seng Congress uba ia iakhun la arsien kynthih mynta na katei ka juh ka party napoh 4 Mowkaiaw Constituency.
Haka jingialang jong ki Samla ka Shnong Iooksi Pyllun, la ioh ban kren na kiba bun ki samla ka shnong kiba la ai jingmut bad bad kiba la kyntu ia ki paidbah ban kyrshan tylli ia u ma Nehimaya Tyngkan khnang ba ka jingthmu bad jingangnud jong u ban shakri iaki paidbah kan urlong.
Haba ai jingkren naka liang u samla Nangaibormi Sutnga ula ong ba ka jingkylla haka synshar hi kan wan tang lada ki paidbah nongthep vote ki sngewthuh iaka jingdonkam ka jingsynshar kaba khuid kaba suba dakaba kiar shwa ialade naka jingshah thied tad dor haki bor ka pisa.
“Hooid ymlah ban len ba katba dang iaid ki por ka jingiakhun elekshon ka nang rem dor nang remdor bad kan sa poi ka por ba u kyrtong uba thrang shisha ban shakri ia ki paidbah un nym nud ia aireng shuh tang namar ba u wan naka longiing baduk, kumta yn nym don jaka ia uba duk ha ka kam sain hima sima” la ong u ma Nangaibormi Sutnga.
Haba ai khublei ia ki samla ka shnong Iooksi Pyllun halor ka jingianoh syññiang jong ki sha u ma Nehemaya Tyngkan ula ong ba lada baroh ki nongshong shnong ki don ia ka mynsiem kaba kum kane, khlempep yn sa ioh ia ka jingsynshar kaba khuid kaba khlem da leh shilliang khmat bad lehbor”. Hakane ka sngi la aiti iaka pisa kaba T.14,070/- tyngka kaba ki samla kila ia synniang ha kane ka jingialang sha u ma Nehemaya Tyngkan bad ia kane ka pisa la ai da u samla Lovelast Lathong u shongknor ka Kynhun ki Samla Ka Shnong Iooksi Pyllun.
