Ka Food Corporation of India (FCI), FSD Jowai kaba don ha Khliehtyrshi, West Jaintia Hills District mynta ka sngi kala ioh ban pynlong ia ka Showcase programme ne ka jingpyni ia ki rukom treikam treijam katkum kane ka juk jong ka jingstad ba mynta bad ruh ia ka rukom buh ia ki mar ki mata khamtam ia u khaw ha ka rukom kaba biang kaba lait na kano kano ka jingpynjulor ne pynsniew ia u khaw uba la pynpoi na ka sorkar Kmie.
Mynta ka sngi la ioh ka jingpyni bad jingbatai sha ki lad pathai khubor ia ka rukom treikam bad rukom buh ia ki mar ki mata da u Technical Assistant ka FCI-FSD Jowai u bah Darlet Dkhar, u ba la iathuh ba ka jingpynioh jong ka sorkar kmie ia u khaw PM-GKAY ka la pynlong ia ka FCI Jowai ban pynheh shuh shuh ia ka jaka buh (Stock) khaw na ka 3750 MT sha ka 4698 MT, khnang ba ka jingdon jong u khaw kan long kaba biang na ka bynta ki nongshong shnong. Ula batai ruh ia ka rukom treikam ba mynta hapoh ka FSD-Jowai ka long katkum ka juk bad jingstad ba mynta da kaba pyndonkam ia ki kor Computer ryngkat ka jingiatreilang bad ka Digital India, kaba iarap ban pynsuk bad pynbiang ia ka rukom treikam ia ki nongtrei ha ki bynta bapher bapher.
U bah Darlet u la pynkynmaw ba ia FCI la seng naduh u snem 1964 lyngba ka Food Cooperation Acts, bad ka jingthmu ba kongsan jong ka sorkar ka long ban pynbiang ia ki marbam kum ia u khaw ban pynioh sha ki jaka ne ki shnong bym shym rep ia u khaw ha ka dor kaba bit. Na ka liang ka FCI kala buh ruh ia ka thong ba baroh ki briew jong ka ri India kin ioh ia ka bam lyngba ka Food Distribution System.
Hapoh kane ka ophis FCI la buh ruh ia ki tiar ban iada na ka jingpluh ding, ki First Aid, ka jaka test ia u khaw (Quality Lab), ka Quality Control Room bad kiwei kiwei ki jingdonkam.
Nalor kane ka ophis ka pyrshang katba lah ban bat ia ka jingkhuid jingsuba hapoh ka ophis treikam, ha ki sawdong sawkun haduh ki jaka buh mar (Godown) ruh.
Shuh shuh u bah Darlet u la iathuh ba kumba long mynta ka FCI-FSD Jowai kala pyndonkam ruh da ki CC TV Camera ha baroh ki bynta jong ka ophis na shapoh bad shabar kumjuh khnang ba ka ophis kan long kaba shngaiñ.
