Ki dkhot na ki ar sengbhalang ba kynthup ia ka Jaiñtia Students’ Union (JSU) bad ka Khasi Students’ Union (KSU) ha ryngkat ka jingiadonlang ki dkhot jong ka Labang Nongphyllut Pangam Raliang Council (LNPC) ha ka jingialang jong ki hynne ka sngi (22/09/2022) ha Mooralong Jowai da kawei ka jingmut kila dawa ba ka sorkar Assam ha kane ka jingiapynbeit pud hapdeng ka Meghalaya, ba katei ka thaiñ Labang Nongphyllut Pangam Raliang ka dei ban wan noh hapoh u pud u sam ka jylla Meghalaya.
Ka jingialang kala pynpaw ba katkum ka jingshisha kane ka thaiñ Labang Nongphyllut Elaka u Daloi Nongpyllut bad Pangam Raliang ka dei ka hok kynti jong ka ri Jaiñtia kaba ka sorkar Assam kala shu kdiah jubor wat hapdeng ka jingpyrshah bad jingbymhun ki paidbah ban khlad na ka ri Jaiñtia, tang na ka jingai District ia ka Mikir Hills bad North Cachar Hills ha ka snem 1951.
Ka JSU bad ka KSU kila dawa na ka sorkar Assam bad ba ka sorkar Meghalaya kan ieng halor ka jingiakut jong ki ar District ka United Khasi & Jaiñtia Hills bad ka Mikir & North Cachar Hills ha ka snem 1957-58.
Ka jingialang ka la jied ruh ia ki nongmihkhmat ban leit ai ia ka rai jong ka jingialang ha u Myntri Rangbah ka jylla u Conrad K. Sangma, sha u Symbud Myntri Rangbah bah Prestone Tynsong bad ruh sha u CEM ka JHADC u ma T. Shiwat.