Ka jingialehkai kynjatbol U Kiang Nangbah Memorial Trophy, Super Division Football Tournament 2022 hapdeng ka Ladthalaboh bad ka 7 Wasa hynne ka sngi ha Kiang Nangbah Stadium, Jowai ka long kaba mar ia ryngkat bor bad kaba itynnad bha.
Ki nongialeh na baroh ar liang ki team ki ialehkai bha bad pyni la ki sap ki phong kaba pynkmen ia ki nongpeitkai bad ia ki ’riew ieid ialehkai phutbol.
Ka jingialeh kaba mar ia ryngkatbor, ha baroh ar liang bad ym don ba ioh ban thep kol haduh ba kut jong ka por jingialehkai (1st bad 2nd half).
Kumta la hap ban pynlong da ka Extra time kaba mar 15 minit shiliang. Ha kane ka jingialehkai ka Ladthalaboh kala ioh shikol lyngba u Edious Laloo ula ioh ban head ia ka bol kaba la shut corner ha ka minit kaba 2 jong ka Extra time.
Katba na ka liang jong ka 7 Wasa wat la ka ioh shibun ki lad ban thep kol, phewse kam shym la lah ban pynphai kylla ia kane ka kol kat haduh kaba kut jong ka Extra Time, kumta ka Ladthalaboh kala jop ia ka 7 Wasa da 1-0 kol. Kumta ka Ladthalaboh kala ap ia ka Final ban ia kynduh ia ka team ka ban jop lashai ka sngi.
Ka jingialehkai (2nd Semi Final) lashai ka sngi kan long hapdeng ka Mynthong pyrshah ia ka Nangbahmulang ha ka por 2:30 nohphai sngi.