Ka Welcome Gayang Memorial School, Jowai, ha kane ka sngi Saitjain ba la dep (24.09.2022), kala ioh ban rakhe ia ka sngi kyrpang ki kmie ki kpa ne kaba la tip kum ka Parents Day.
La pynlong ia ka jingialang kaba lyngkot jong kane ka sngi, ha ka jingsakhilang kiba bun ki longkmie longkpa. U Pastor Rev. Mynried Kyndiah u la ai ki kyntien jingduwai sdang nangta pynbud pat ki kyntien pdiangburom na ka Rev.Dr. Wakiru Kyndiah, katba ia ki kyntien kyrpang ha ka jingiadei bad kane ka sngi la ai da ka kong Dr. B. W. Nongbri, Secretary School Managing Committee ka Welcome Gayang Memorial School, Jowai.
Ka kong Nongbri, haba ai jingkren kala ai ka jingiaroh ia ki longkmie longkpa kiba la pyni ia ka mynsiem iatreilang bad ki bor pyniaid jong kane ka skul na ka por sha ka por bad ka la kyrmen ruh ba kane ka jingiatreilang jong ki kmie ki kpa bad ka skul kan kyntiew shuh shuh ia ka bha ka miat jong ki khynnah skul.
Na ka liang ki khynnah skul kila dap da ka mynsiem kaba kmen bad ka khmat ba phuh samrkhie haba ki ioh ka lad ban pyni ia ki sap ki phong jong ki ha khmat ki kmie ki kpa bad ki nonghikai jong ki. Ha kane ka sngi ia ki kyntien pynwai bad duwai la ioh na u Rev. Dr. E.R.Tongper.
