U Chief Secretary ja sorkar jylla bah D.P. Wahlang, IAS, mynta ka sngi ula wan poi ha nongbah Jowai ban ia kynduh bad iaphylliew jingmut bad ki bor pyniaid District ka West Jaiñtia Hills District halor ka hukum jong ka NGT.
Ia ka jingialang la pynlong ha ophis u DC Jowai, ha ka jingiadon ryngkat u bah M.R. Synrem, IAS Commissioner and Secretary, Urban Affairs Department, u bah E. Kharmalki, IAS, Director, Urban Affairs Department, u bah B.S. Sohliya, IAS, Deputy Commissioner, West Jaintia Hills District, u Shri. R.S. Gill, IFS, Principal Chief Conservator of Forest bad Chairman ka MSPCB nalor kiwei de.
Haba kren ha ka jingialang la iakren ia ka hukum kaba la pynmih da ka National Green Tribunal katkum ka O.A. 172/2016/EZ, Sajay Laloo vrs State of Meghalaya. Na ka liang jong u Chief Secretary u la ban jur ia ki bor pyniaid District, iaka Jowai Municipal Board bad ruh ia ka Urban Affairs Department ba ki dei ban bud pyrkhing ia ka hukum kaba la pynmih da ka NGT halor ka jingbha jingmiat jong ka wah Myntdu. Na ka liang jong CS ula kyntu ia u DC ka District ba u dei ban shimkhia ban peit ba kan ym don kano kano ka jingpynjakhlia ia ka Wah Myntdu ne ka jingkyntur jaka sha ki rud jong ka bad na ka bynta kito ki jingtei kiba don hapoh ka jingjngai kaba 50 meter ruh la dei ban weng noh ia ki.
Ula ban jur ruh ia u DC ban peit dalade ia ka jingdonkam jong ka jingkhuid jingsuba jong ki bynta ba tuid sha ka Wah Myntdu ha kaba dei ban don ki jaka pynlang jakhlia kiba biang katkum ka juk mynta bad la bthah ba baroh ki thliew ïing hapoh ka nongbah Jowai ki dei ban don ia ki Septic Tank ba paka.
