[La pynkut ia ka jingrakhe Poshan Maah ba shibnai lynter ha EJH]
Ia ka jingrakhe ba shibnai lynter ia ka Rashtriya Poshan Maah ha East Jaintia Hills District kaba la pynlong da ka ophis jong u Districit Programme Officer, ICDS (Cell), East Jaintia Hills District, Khliehriat ryngkat ka jingiatrei lang ki tnat treikam sorkar bapher bapher hapoh ka District kala poi noh sha kaba kut mynta ka sngi. Ha kaba la pynlong ia ka jingialang pynkut ha Community Hall jong ka Jalaphet Bri-Sutnga.
Ka phangpdeng jong kane ka prokram ka dei “Mahila Aur Swasthiya” bad ka “Baccha Aur Shiksha”.
U Deputy Commissioner ka East Jaintia Hills District, Khliehriat u A. Baranwal, IAS ula long u kongsan ha kane ka sngi. La iadon lang ruh u Dr. Dominic Shylla, District Medical and Health Officer, East Jaintia Hills District, Khliehriat, kong M.J. Shylla, District Agriculture Officer, East Jaintia Hills District, Khliehriat, u T. Kyndiah, District Child Protection Officer, East Jaintia Hills District, Khliehriat, bad ka kong D. Iakai, I/c Child Development Project Officer (CDPO), East Jaintia Hills District, Khliehriat, u ma R. Dkhar, Waheh Shnong Jalaphet Bri Sutnga.
Haba kren kum u kongsan u Baranwal ula ai khublei kyrpang ia ki kynhun jong ka ICDS kiba la pynlong ia shibun jait ki prokram hapoh ka Poshan Maah. Ula ong ruh ba ka bynta jong ki nongtrei Anganwadi ka long ban pynbiang ia ki jingbam batei met sha ki khynnah rit kiba dang pule ha ki Pre-School, kumjuh ban pynbiang bam ia ki longkmie ba ar met bad ka jingai dawai ia ki. Ha kajuh ka por u kyntu ia baroh ki Committee shnong bad ki Waheh Shnong ba kin leit jurip man la ka por ia ki Anganwadi Centre khnang ba ka jingai jingbam bad ka jingpyniaid kam ha kine ki centre kan long kaba iaid beit iaid ryntih.
Ha kane ka prokram u DC ula ai ruh ia ka khusnam sha ki ar ngut ki longkmie kiba tista ban shim ia ki lad jingsumar bad kiba smat bha ban wan sha ki Anganwadi Centre (AWC), la ai khusnam ruh ia ki kynnah rit kiba wan tista sha kine ki Pre-School ba don ha ki Anganwadi Centre. Kiwei de kiba ai jingkren ki kynthup ia ka kong D. Iakai, u Dr. Dominic Shylla, kong M J. Shylla bad ma T. Kyndiah.
