Ka Women Welfare Organisation, Seiñraij Jwai mynta ka sngi 5 tarik Risam kala pynlong ia ka jingiakynduhlang ki khun kynthei ka seng ha Yungwalieh ka Loompyrdi Iongpiah ha kaba u ma Wailadmiki Shylla, MLA Jowai ula long u konsan, katba u ma A.Andrew Shullai, MDC-Jowai Central ula long u symbud kongsan ha ka jingiadon ryngkat u Daloi ka Elaka Jwai u Wh. Puramon Kynjin bad ki riew pawkhmat jong ka Seiñraij.
Ha kane ka jingialang la don ruh ka jingpynkup burom ia ki khun samla jong ka Seiñraij. Ia ka jingialang la pyniaid da ka kong Hima Lakiang, Chairperson WWO, Seinraij bad ka jingnguh Blei da ka kong Rilistina Pyrbot.
Na ka liang jong u ma Wailadmiki Shylla ula ai ka jingiaroh ia ki dkhot jong ka Womens Welfare Organisation, Seiñraij kiba la trei shitom ia la ka kamram na ka bynta ka bha ka miat jong ka imlang sahlang wat hapdeng ka jingkhia ka kam ïing kam sem ba ki hap ban mit man la ka sngi.
Ula mynsiem ruh ia kine ki khun samla kiba la shah pynkup burom mynta ka sngi da kaba ong ba ki dei ban kut jingmut ban ioh ia ki Percentage kiba kham heh shuh shuh bad ynda kila don ha ka kyrdan kaba heh ynda kila san kila rangbah, kim dei pat ban klet ia la ka jong ka jinglong tynrai jong ki.
Ha kane ka juh ka sngi u ma Wailad ula synniang ruh Rs.1 lak (Shi lak tyngka) sha ka WWO-SRJ.
Ki samla kiba la shah pynkup burom ki dei kiba la ioh 80 % shaneng ha ka HSSLC bad ka SSLC katba 70 % shaneng ia kiba pyndep ia ka Degree Level ha ki lain bapher bapher.
Ki lai ngut ki khun samla jong ka Niamtri kiba la ioh ia ka Topper mynta u snem ki long ka Hakacheini Passah na Loomiongkjam kaba la pass ia ka HSSLC Examination 2021 da kaba ioh 88.8% ryngkat ki Distinction ha ka subject Khasi, Chemistry, Biology, Maths bad ka Physic, u Roderick Passah na Dulong ba la pass ia ka SSLC Examination 2022 ba la ioh 90.50% bad ki Distinction ha ka subject English, Additional English, Science & Technology, Social Science, Mathemmatics bad ka Physical & Health Education, nangta ka Arwaka Lamurong na Dulong kaba pass ia ka SSLC Examination 2021 da kaba ioh 87.83% ryngkat ki Distinction ha ka subject English, Mathematics, Scince & Technology, Social Scince, Health Education bad ka Khasi.
U ma Andrew ruh kum u symbud kongsan, ula ai ki kyntien pynioh mynsiem ia ki khun samla ka Seiñraij da kaba pynkynmaw ba ka juk mynta ym dei shuh tang ba la stad dei ioh kam kam sorkarbeit, hynrei lyngba ka jingstad kaba ki don ki dei ruh ban long kiba shemphang ha kiwei pat ki liang khnang ba kin lah ban tei ia ka lawei jong ki.
La ioh ruh ka jingkren na u ma Arwotki Sumer, General Secretary, Seinraij Jwai uba la pashad ia ki kyntien sneng kyntien kraw ia ki khun samla kiba la shah pynkup burom ha kane ka sngi. Ia ki kyntien aikhublei khadduh la ai da ka kong Hunbaiki Dkhar, Secretary WWO-SRJ.
