Ka National People Party (NPP) ka 7-Amlarem Block West Jaiñtia Hills District mynta ka sngi Thohdieng kala ïoh ban pdiang bad pynskhem ïa ki dkhot thymmai shapoh ka seng NPP da kaba aiti ruh ïa ki form jong ka seng da u ma Wailadmiki Shylla ha u ma R.L. Tariang uba dei u District President NPP ka WJHD.
Ha kane ka sngi da ki spah ngut ki nongshong shnong na ka thaiñ Amlarem kila poi sha kane ka jingialang ba la pynlong ha Syiem Jingsuk Hall, Amlarem
Kiwei de kiba ïadon lang ki kynthup naduh u ma Stephanson Mukhim u kyrtong MLA na ka 7-Amlarem, ma R.L. Tariang, ex MLA, ma Holando Lamin (MDC) War Central, ma Saron Paswet (MDC Jowai South Constituency, ma Het Pohthmi MDC War West Constituency bad uba dei u Block President, ma Octomewot Lamin, nalor kiwei de bad ki paidbah ka thaiñ.
Kiba bun na ki nongnkren kila pynrem jur ia ka jingtreikam jong u MLA ka thaiñ u ma Lahkmen Rymbui ki bym lah ban pynhun ia kiba bun ba lang, la kynthoh ruh halor ka jingkop ma Rymbui ban wanrah ia ki skim bapher bapher kiba long tang ki jingpynbeij ia ki nongkyrshan. Shuh shuh kila kynthoh ia ka jingshah lehbeiñ jong ki nonghikai naduh ki Adhok, SSA bad ki nonghikai Casual. Da kaba ki ong kine ki mih tang na ka daw ka jingbymbiang ka rukom treikam u ma Rymbui kum ki nongbat ia ka tnad Pule puthi bad kumjuh ia ka kam khappud.
Ha kane ka sngi ka Seng kala iakren ban pynbha pynmiat shuh shuh ia ka rukom treikam hapoh ka 7-Amlarem Constituency na ka bynta ka Election 2023. Ban iapyrkhat ia ka jingialang bah na ka bynta ka jingwan u myntri rangbah ka jylla bad kiwei de.
La kyntu ia ki Unit bapher bapher hapoh kane ka Constituency ba kin treishitom ban peit ia ki jingeh jong ki paidbah kaba lah ban pynsuk shuh shuh ia u Candidate ban trei ia ka kam.
La pynsngew ruh da ki nongkyrshan ka seng mynta ka sngi ba ki don shibun ki nongialam ba rim jong kiwei de ki seng sain hima sima. Kila wan ban ai jingkyrshan ia u kyrtong ka NPP ma Mukhim ha kane ka Election 2023.
U ma R.L Tariang u ong kane ka dei ka sngi sah jingkynmaw kum ki nongkyrshan ba thymmai ka NPP, ula pynsngew ba ia ka tiket na ka 7 Amlarem la tikna ban ioh u ma Staphanson Mukhim. Bad kyrmen skhem ba un trei kambha ia ka Constituency ha kaba iadei bad ka kam jngoh kai pyrthei kaba long katkum ka jinglong jingman jong ka jong kane ka jaka.
U la ong shuh ba nalor jong u kum u Ex-MLA sa san ngut ki MDC ka thaiñ kin ai ka jingkyrshan ba pura ia u ma Stephanson Mukhim.
